Ոչ թե սահմանադրական փոփոխությունները, այլ գործող Սահմանադրությունն է իշխանությանը վերարտադրվելու հնարավորություն տալիս

Այսօր՝ լրագրողների հետ հանդիպման ժամանակ, ԱԺ տնտեսական հարցերի մշտական հանձնաժողովի նախագահ, ՀՀԿ-ական Արտակ Զաքարյանն անդրադարձավ սահմանադրական փոփոխություններին դեմ արտահայտվողների գործողություններին: Հիշեցնենք, որ «Ոչ»-ի կողմնակիցները երեկ Երևանում հանրահավաք էին կազմակերպել:

«Ոչ»-ի կողմնակիցներին ոչինչ չի հաջողվի, որովհետև նրանք ունեն մեկ պարզ  հաշվարկ՝ հասարակությունն ունի դժգոհություններ, դրանց վրա պետք է կառուցել հակաիշխանական տրամադրություն ու գնալ հետևյալ բանաձևով` «Իշխանությունն առաջակում է սահմանադրական փոփոխություններ, ուրեմն դա վատն է»: Բայց մենք գործ ունենք երկրի ապագայի կառավարման, ոչ թե հասարակություն-իշխանություն հարաբերությունների հետ: Հետևաբար, «Ոչ»-ի գործողությունները գտնվում են մարգինալ,  ոչ ռացիոնալ, անհեռանկարային դաշտում»,- ասաց Արտակ Զաքարյանը` հավելելով, որ «ոչ»-ը նշանակում է մնալ նույն տեղում, ապագայում ևս բոլոր խնդիրները բարդել իշխանության վրա, իսկ «այո»-ն նշանակում է ապագայի համար ունենալ հնարավորություններ:

Ըստ պատգամավորի՝ մեկ ամիս անց ակտիվ գործողություններ սկսելը «ոչ» քարոզող քաղաքական ուժերի կողմից պայմանավորված է նրանով, որ նրանք անելիք չունեն, մեկ ամիս շարունակ հասարակությանը պետք է ասեն այն, ինչը հնարավոր է ասել 10 րոպեում, մինչդեռ՝ «Այո»-ն մեծ ծավալի աշխատանք ունի անելու, որովհետև հասարակությանը պետք է ներկայացնեն հսկայական ծավալի փոփոխությունները:

«Նրանք կփորձեն անհնազանդության կոչերի միջոցով փողոցում հավաքել մարդկանց ու բոյկոտել հանրաքվեն, բայց այդ դեպքում նրանք, բնականաբար, խնդիր կունենան օրենքի հետ»,- ասաց Արտակ Զաքարյանը:

Ըստ պատգամավորի՝ եթե որոշ ուժեր իրենց համարում են քաղաքական ուժ, ապա տարօրինակ է, որ նրանք կողմ են կիսանախագահական կառավարման համակարգին և դեմ են խորհրդարանական կառավարման համակարգին:

Այն հարցին, թե իշխանության վերարտադրությանը կամ իշխանության մնալուն նպաստում է գործո՞ղ Սահմանադրությունը, թե՞ առաջարկվող Սահմանադրությունը, Արտակ Զաքարյանը պատասխանեց. «Գործող Սահմանադրությունը»: