Եթե հիմնարար սկզբունքները չընդունվեն, ստիպված կլինեն հանդես գալ նոր հայեցակարգով

ԵԱՀԿ Մինսկի խումբը Ղարաբաղյան հակամարտության կարգավորման ներկա փուլում ցուցադրեց իր արդյունավետությունը. կարծիք է հայտնել ԵԱՀԿ ՄԽ ամերիկացի համանախագահ Ռոբերտ Բրադկեն` ելույթ ունենալով այսօր Եվրախորհրդարանում անցկացվող` Ղարաբաղյան հարցով լսումների ժամանակ:

«ԵԱՀԿ ՄԽ ձեւաչափը բավական ճկուն է եւ ունակ արագ արձագանքել տարածաշրջանում տեղի ունեցող բոլոր փոփոխություններին»,- ասել է նա:

Խոսելով համանախագահների աշխատանքի արդյունավետության մասին` Բրադկեն հայտարարել է. «Կարեւորը, որ մեզ հաջողվեց, նոր պատերազմից խուսափելն էր»:

Իսկ ֆրանսիացի համանախագահ Բեռնար Ֆասիեն համարում է, որ Եվրամիությունը հակամարտության կարգավորման գործում վճռական դեր ունի, «նվազագույնը` երկու երկրների քաղաքացիական հասարակություններին նախապատրաստելը»:

Նա նաեւ հայտարարել է, որ եթե հիմնարար սկզբունքները մոտ ժամանակներս չընդունվեն, համանախագահները ստիպված կլինեն նոր հայեցակարգով հանդես գալ: