Մտավախություն կարող ենք ունենալ, երբ մեր կանայք սկսեն շատ ակտիվ պայքարել. ՀՀԿ-ական պատգամավորն անկեղծացավ

Տևական ժամանակ է, ինչ ակտիվորեն խոսակցություններ են տարածվում, թե պայքար է գնում ՀՀԿ կանանց ցուցակը գլխավորելու համար: Նշվում է, որ այդ ցուցակը գլխավորելու է արդարադատության նախարար Արփինե Հովհաննիսյանը, ինչին դեմ են ՀՀԿ-ական կին պատգամավորները: Նրանք պատրաստվում են հանդիպում խնդրել նախագահ Սերժ Սարգսյանից և նրա մոտ բարձրացնել այդ հարցը:

Yerkir.am-ի հետ զրույցում ՀՀԿ խմբակցության պատգամավոր Սուքիաս Ավետիսյանը, անդրադառնալով այս թեմային, նշեց, որ ինքը նման խոսակցություն չի լսել: «Մի կին չի լինելու ցուցակում, մի քանի հոգի են լինելու: Ինչո՞ւ են ժամանակից շուտ նման մտավախություններ կամ քննարկումներ տարածում: Սպասենք, երբ որ կքննարկվի այդ հարցը, այդ ժամանակ էլ կարելի է  խոսել այդ մասին»,- ասաց նա` նշելով, որ նման հարցերի համար կարգ կա, կանոն կա, և պետք է սպասել` մինչև ամեն ինչ պարզ լինի:

Մեր դիտարկմանը` կանայք միշտ էլ պայքարում են միմյանց դեմ, նույնիսկ` խոհանոցում, թե ով է ավելի համեղ պատրաստում, Ավետիսյանը ծիծաղեց, ապա խոստովանեց, որ, այո, նման բան կա, ինչը վատ չէ:

Այնուհետև նա նշեց, որ պետք է խոստովանել, որ կանայք շատ ակտիվ են, բոլորն էլ ուզում են առաջնային տեղեր զբաղեցնել, և որ ինքը ողջունում է կանանց ակտիվությունը:

Մեր հարցին` մտավախություն չունի՞, որ կանանց այս պայքարը կարող է ստվերել տղամարդկանց քարոզարշավը, պատգամավորն արձագանքեց. «Այդ մտավախությունը կարող ենք ունենալ, երբ կանայք սկսեն շատ ակտիվ պայքարել: Բայց մտավախություն չունեմ, որ ՀՀԿ քարոզարշավն այդ պայքարից կտապալվի: Ընտրական օրենսգրքով հստակ ամրագրված է, թե կանայք քանի տոկոս պետք է լինեն ցուցակում»:

Վերջում Ավետիսյանը կրկնեց, որ կանանց այդ պայքարով ընտրարշավը չի տապալվելու, հակառակը` ցանկացած պայքար ընտրարշավն ավելի ակտիվ ու հաճելի է  դարձնում: