Մեղավորը ես եմ, որ չեմ կարողանում ասել` հերիք ա, էլի. պատգամավորն անկեղծացավ

ՀՀԿ Խորհրդի նիստից առաջ կարծես թե գինովցած ԱԺ ՀՀԿ խմբակցության պատգամավոր Աշոտ Աղաբաբյանը, չանսալով իր թիկնապահի հորդորներին, խոսեց լրագրողների հետ: Ըստ Աշոտ Աղաբաբյանի` Հայաստանի վիճակը լավ կլինի այն դեպքում, եթե լրագրողները ձևակերպեն իրավիճակն այնպես, ինչպես կա, այլ ոչ այնպես, ինչպես իրենք են ուզում տեսնել:

Yerkir.am-ի հարցին, թե ինչպիսի՞ն է հիմա Հայաստանի իրավիճակը` իր ձևակերպմամբ, պատգամավորը պատասխանեց. «Շատ լավ ա, մեռնեմ Հայաստանիս ջանին»: Լրագրողների այն հարցին, թե կարո՞ղ է պատգամավորը մատնացույց անել առկա վատ վիճակի մեղավորներին, Աշոտ Աղաբաբյանն անկեղծացավ. «Մեղավորը ես եմ, որ չեմ կարողանում ասեմ, որ....հերիք ա, էլի»: Այդպես էլ պարզ չդարձավ, թե պատգամավորը ում նկատի ունի: