Վերին Լարսում խնդիրների ժամանակ օգնելու ենք արտահանողներին` տեղափոխել ապրանքը. Սուրեն Կարայան

Այսօր` լրագրողների հետ հանդիպման ժամանակ, տնտեսական զարգացման և ներդրումների նախարար Սուրեն Կարայանն ամփոփեց տնտեսական տարին: Խոսելով արտահանման մասին` նա նշեց, որ Հայաստանի տնտեսությունը, ունենալով փոքր շուկա և մասշտաբային էֆեկտի բացակայություն, կարող է գործել առաջարկի վրա հիմնված տրամաբանությամբ, այսինքն` արտահանումը պետք է լինի տնտեսության զարգացման շարժիչ ուժը:

«Այս տարի Հայաստանից արտահանման աճը եղել է ռեկորդային` շուրջ 21 տոկոս` նախորդ տարվա համեմատ: Այնուամենայնիվ, այդ ցուցանիշները մեզ չեն գոհացնում,  որովհետև ՀՆԱ-ում արտահանման ծավալները կազմում են մոտ 30 տոկոս: Տնտեսական աճ ապահովելու համար պետք է հասնել այն ցուցանիշին, որ արտահանման ծավալները կազմեն առնվազն 40-50 տոկոս»,- ասաց նախարարը:

 Նրա խոսքով` կան խնդիրներ արտահանման բնագավառում, որոնցից  մեկը շուկաների կենտրոնացված լինելն է, ուստի պետք է փորձեն դիվերսիֆիկացնել` ըստ երկրների ու ապրանքատեսակների: Ուսումնասիրությունները ցույց են տալիս, որ Հայաստանը շատ ցածր արտահանման ներուժ ունի` հենց հարևան երկրների հետ կապված: Մասնավորապես` արտահանումը դեպի Իրան ունի ցածր ցուցանիշներ, կա չօգտագործված ներուժ, և նախարարության առաջիկա անելիքներից է լինելու դեպի Իրան արտահանման աշխուժացման ուղղությամբ ջանքեր գործադրելը: Նախարարությունը օպերատիվ քայլեր է իրականացնելու` վերացնելու համար այն խոչընդոտները, որոնք դեռևս առկա են Հայաստանի համար արտոնյալ շուկաներում:

 Արդեն ձևավորվել է աշխատանքային խումբ ՌԴ Վերին Լարսի, ՀՀ ՊԵԿ և ՀՀ տնտեսական զարգացման նախարարության պաշտոնյաներից բաղկացած, որը կփորձի լուծումներ տալ հայաստանյան ապրանքատեսակների արտահանման խնդիրներին:

 «Երբ Վերին Լարսի անցակետը ինչ-ինչ պայմաններում փակ կլինի, օդային բեռնափոխադրումների համակարգի միջոցով հնարավորություն կտան բեռները մատչելի գներով տեղափոխելու այն տնտեսվարողներին, որոնց ապրանքը արագ փչացող է, և ովքեր տեղափոխում են իրենց ապրանքը ԵՏՄ շուկա»,- ասաց Սուրեն Կարայանը: