Մշակվում է օտարերկրյա ներդրողների մասին նոր օրենք. Սուրեն Կարայան

Այսօր խորհրդարանում լսումներ են կազմակերպվել՝ «Հայաստանի արտաքին քաղաքականության տնտեսական բաղադրիչը» թեմայով, որին մասնակցում են ՀՀ վարչապետ Կարեն Կարապետյանը, ԱԺ պատգամավորներ, բիզնես սեկտորի ներկայացուցիչներ, Հայաստանում միջազգային ընկերություոնների ներկայացուցիչներ:

Ելույթով հանդես եկավ տնտեսական զարգացման և ներդրումների նախարար Սուրեն Կարայանը խոսեց այն քայլերի մասին, որը նախաձեռնում է իրականացնել իր գլխավորած նախարարությունը օտարերկրյա ներդրումներ ներգրավելու նպատակով: Նա մատնանշեց չորս առաջնային ուղղություն՝ ներդրումային միջավայրի բարելավում, ներդրումային գորընթացի բացահայտմանն ուղղված քայլեր, օտարերկրյա ներդրումների ներգրավման նոր մեխանիզմների մշակում, ներդրումային ճանաչելության բարձրացմանն ուղղված քայլեր: Նախատեսվում է բարելավել նաև օրենսդրական միջավայրը, պարզեցնել գործարար միջավայրին վերաբերող օրենսդրական ակտերը, գործարար-պետություն համագործակցությունը:

Սուրեն Կարայանը նշեց, որ ամիսը մեկ անգամ նախարարությունում հանդիպումներ են կազմակերպվելու օտարերկրյա ներդրողների հետ: Ներկայումս մշակվում է օտարերկրյա ներդրողների մասին նոր օրենք, այն ներկայացնելու են օտարերկրյա բազմաթիվ ներդրողների, որպեսզի ստանան նրանց կարծիքն ու առաջարկությունները:

Ըստ Կարայանի` կառավարության կողմից իրականացվող հարկային ու մաքսային բարեփոխումները շոշափելի ու դրական ազդեցություն կունենան գործարար համայնքի ակտիվացման վրա: Ներդրումային պոտենցիալի բացահայտման ուղղությամբ նախատեսվում է Հայաստանի զարգացման հիմնադրամի շրջանակներում ստեղծել կարողություններ, ուսումնասիրել պոտենցիալ ոլորտները և ներդրումային ծրագրերը, որպեսզի դրանք առաջարկեն ներդրողներին: Ներդրողներին աջակցելու նպատակով ստեղծել են մեկ պատուհանի սկզբունքը, երբ ներդրողը դիմում է Հայաստանի զարգացման հիմնադրամին, և, այդ պահից սկսած, հիմնադրամն իր ամբողջ անձնակազմով ուղեկցում և աջակցում է ներդրողին` մինչև գործունեության մեկնարկ:

«Դիվանագիտական կորպուսը պետք է լինի այն կամուրջը, որով ներդրողներին կկապի Հայաստանի հետ` ներկայացնելով Հայաստանի ներդրումային առավելությունները»,- ասաց Սուրեն Կարայանը: