Ուրեմն լավ չենք արել, որ ուշացրել ենք. Կարեն Կարապետյանը` գյուղնախարարին

Այսօր կառավարության նիստում գյուղատնտեսության նախարար Իգնատի Առաքելյանը ներկայացրեց «Պետական աջակցություն գյուղատնտեսական հողօգտագործողներին մատչելի գներով դիզելային վառելիքի ձեռք բերման համար» ծրագրի շրջանակներում սուբսիդիա տրամադրելու մասին հարցը:

Նախատեսվում է 2017թ. գյուղատնտեսական աշխատանքների իրականացման համար հողօգտագործողներին մատչելի գներով դիզելային վառելիք տրամադրելու նպատակով 170 միլիոն 500 հազար դրամ սուբսիդիա տրամադրել «Մաքսհուր» ՍՊԸ-ին մինչև 5,000,000 լիտր դիզելային վառելիքի մատակարարումները կազմակերպելու նպատակով: Մրցույթում հաղթել է վերոնշյալ ընկերությունը, ըստ այդմ`  1 լիտրը 314 դրամ արժեքով, որից սուբսիդավորման ենթակա գումարը 1 լիտրի համար 34 դրամ է:

Վարչապետը հարցրեց. «Մենք այս հարցը ուշացրել ե՞նք»: Նախարարը նշեց, որ ուշացրել են գարնանացանի աշխատանքների առումով, քանի որ մտածում էին, որ գուցե իմաստ չունի այդ ծրագիրն իրականացնել:

«Ուրեմն լավ չենք արել: Հետևեք, որ այդ հարցը մաքսիմալ կարգավորենք»,- ասաց Կարեն Կարապետյանը: