Ինտենսիվ, կպած անում եք. հանձնարարական՝ գյուղնախարարին

Կառավարության նիստի օրակարգին անցնելուց առաջ ՀՀ վարչապետ Կարեն Կարապետյանը հանձնարարական տվեց գյուղնախարարությանը` ՌԴ-ում և այլ երկրներում գյուղտեխնիկա արտադրող ընկերությունների ներկայացուցիչների հետ հանդիպել տեխնիկայի մատակարարման պայմանները քննարկելու նպատակով:

«Մեկ ամսվա ընթացքում ներկայացնել ՀՀ-ում գյուղտեխնիկայի լիզինգի աջակցության ծրագիր: Պարո'ն Առաքելյան, «Ռոսսելմաշ»-ի հետ ե՞րբ եք հանդիպել»,- գյուղնախարարին հարցրեց վարչապետը:

Գյուղնախարարը պատասխանեց, որ այսօր կհանդիպեն, իսկ վաղը պաշտոնական այց կլինի մնացած ընկերություններ: «Շատ ինտենսիվ, կպած անում եք»,- ասաց Կարեն Կարապետյանը:

Կառավարության ծրագրով նախատեսված է, որ պետք է մշակել բնակլիմայական աղետների կանխարգելման հայեցակարգ: «Հանձնարարում եմ, որ հայեցակարգի շրջանակներում անդրադարձ կատարվի նաև ամպացրող թնդանոթների և կարկտապաշտպան ցանցերի արդյունավետության իրացվելիությանը: Ծրագիրը պետք է մշակվի առավել խոցելի համայնքներում կարկուտի էական վնասների նվազեցման նպատակով»,- նշեց վարչապետը: