Վարչապետի հանձնարարականն անակնկալի բերեց գյուղնախարարին

Գյուղատնտեսական տեխնիկայի պետական տեսչությունը կլուծարվի: Նման հանձնարարական այսօր` կառավարության նիստի ժամանակ, տվեց ՀՀ վարչապետ Կարեն Կարապետյանը:

Նա հանձնարարեց գյուղատնտեսության նախարար Իգնատի Առաքելյանին` մեկ շաբաթյա ժամկետում կառավարությանը ներկայացնել ՀՀ գյուղատնտեսության նախարարության գյուղատնտեսական տեխնիկայի պետական տեսչությունը լուծարելու վերաբերյալ փաթեթ:

Գյուղատնտեսության նախարարը վարչապետից հետաքրքրվեց, թե ում է անցնելու այդ գործառույթը: «Որովհետև ես տեղյակ չեմ` ընդհանրապես, առաջին անգամ եմ լսում»,- ասաց նա:

ՀՀ կառավարության աշխատակազմի ղեկավար-նախարար Դավիթ Հարությունյանը պարզաբանեց, որ ուսումնասիրվել են բոլոր տեսչությունների գործառույթները, և գյուղնախարարության ենթակայության տակ գործող տվյալ տեսչությունը, որը զբաղվում է է պետհամարանիշների տրամադրմամբ, կլուծարվի, իսկ այդ գործառույթը կփոխանցվի ոստիկանությանը: