ՀՀԿ-ական դարձող գյուղնախարարին ծանոթ չէ Նժդեհի գաղափարախոսությունը

Այսօր` կառավարության նիստից հետո, լրագրողները գյուղատնտեսության նախարար Իգնատի Առաքելյանից հետաքրքրվեցին` արդյո՞ք հետևելու է վարչապետի օրինակին` անդամակցելով ՀՀԿ-ին:

«Այո, հետևելու եմ վարչապետի օրինակին, դիմում գրելու եմ` ՀՀԿ-ին անդամակցելու համար: Այսօր կգրեմ դիմումը»,- ասաց նա` հավելելով, որ թեև պարտադիր չէ կուսակցական դառնալը, սակայն ինքը թիմային աշխատող է, ուստի կդառնա կուսակցական:

Հարցին, թե ի՞նչ դրդապատճառներով է անդամակցելու ՀՀԿ-ին, Իգնատի Առաքելյանը պատասխանեց. «Նրա գաղափարախոսությունն ինձ մոտ է»: Սակայն հարցին, թե ի՞նչ կարող է մեջբերել Նժդեհի գաղափարախոսությունից, արդյո՞ք ծանոթ է այդ գաղափարախոսությանը, նախարարն անկեղծ պատասխանեց. «Ոչ, ծանոթ չէ, բայց ես համարում եմ, որ այսօր ճիշտ է անդամակցել ՀՀԿ-ին»:

Նա հավելեց, որ միշտ էլ իր ձայնը ընտրությունների ժամանակ տվել է ՀՀԿ-ին, նախագահական ընտրություններում` Սերժ Սարգսյանին, այնպես որ` իր` ՀՀԿ-ական դառնալը տրամաբանական է: