Խնդիրները շատ են, բայց տեսանելի եւ լուծելի են. Վաչե Տերտերյան

Այսօր ԱԺ արտահերթ նիստում քննարկվում է «Վարչատարածքային բաժանման մասին», «ՏԻՄ կառավարման մասին» օրենքներում փոփոխություններ ու լրացումներ կատարելու և առաջին ընթերցմամբ ընդունելու մասին հարցը:

ՀՀԿ-ական Արտակ Զաքարյանը հիմնական զեկուցող` տարածքային կառավարման և զարգացման փոխնախարար Վաչե Տերտերյանին հարց ուղղեց, թե արդյո՞ք կբավականացնեն կադրային ռեսուրսները համայնքների խոշորացումը պրոֆեսիոնալ մակարդակով իրականացնելու, ֆինանսական ռեսուրսները միավորելու և արդյունավետ կառավարելու համար: Նաև` այդ 108 համայնքներն արդյո՞ք պատրաստ են խոշորացման, թե շատ ու շատ խնդիրներ կան:

Վաչե Տերտերյանի խոսքով` իսկապես համայնքների խոշորացման գործընթացում կլինեն մարդկային մասնագիտական կարողությունների խնդիրներ, սակայն մեծ համայնքներում կա պոտենցիալ` այդ բացը լրացնելու համար, և արդեն խոշորացված երեք համայնքներում հստակ ծրագրերի ուղղությամբ աշխատանքներ են տարվում. այնտեղ ռեսուրսների խնդիր չկա: Հաշվի են առնվել բոլոր հնարավոր խնդիրները, տարվում են նախապատրաստական աշխատանքներ, և համայնքների խոշորացումից հետո կազմվելու են համապատասխան ռեսուրսներ:

Արտակ Զաքարյանը հարցրեց, թե այդ փնջերից ո՞րն է ավելի խնդրահարույց համարվում: Վաչե Տերտերյանը պատասխանեց, որ ինչքան  ընդգրկված համայնքների թիվը մեծ է փնջում, այնքան խնդիրները շատ են, բայց տեսանելի և լուծելի: