Միշտ չէ, որ հեծանիվ պետք է հորինենք. Վաչե Տերտերյան

Այսօր ԱԺ արտահերթ նիստում քննարկվում է «Վարչատարածքային բաժանման մասին», «ՏԻՄ կառավարման մասին» օրենքներում փոփոխություններ ու լրացումներ կատարելու և առաջին ընթերցմամբ ընդունելու մասին հարցը:

Հիմնական զեկուցող` ՀՀ տարածքային կառավարման և զարգացման փոխնախարար Վաչե Տերտերյանը նշեց, որ համայնքային կենտրոններն ընտրվում են` որոշակի սկզբունքներից ելնելով, օրինակ՝ համայնքային կենտրոնը պետք է լինի ենթակառուցվածքներով հագեցած, աշխարհագրորեն ավելի նպատակահարմար տեղում, ունենա կադրային պաշար և այլն: Սակայն կարող են շեղվել այդ սկզբունքներից` ենթադրելով, որ որոշ ներդրումների պարագայում տվյալ համայնքը կարող է դառնալ լավ կենտրոն:

ԱԺ պատգամավոր Էդմոն Մարուքյանը հարցրեց, թե ինչո՞ւ է առանց հանրաքվեի անցկացվում վարչատարածքային բարեփոխումը: Նա առաջարկեց նաև քվոտավորում համայնքապետերի հարցում, որ լսելի լինեն բոլոր համայնքների խնդիրները:

Վաչե Տերտերյանը նշեց, որ պետք է ձեռնարկվեն միջոցառումներ, որ քվոտավորում լինի, ներկայումս քննարկվում են դրանց մեխանիզմները:

Ինչ վերաբերում է հանրաքվեին, ապա, փոխնախարարի խոսքով, գործող Սահմանադրությամբ ամրագրված է, որ ԱԺ-ն լսում է համայնքների ձայնը, նոր Սահմանադրությամբ էլ խնդիր և հակասություն չկա:

ԲՀԿ խմբակցության պատգամավոր Էլինար Վարդանյանը հարցեց` արդյո՞ք տեսանելի քայլեր են արձանագրվել պիլոտային ծրագրի ժամանակ, որ որոշվեց ընդլայնել համայնքների խոշորացումը:

Վաչե Տերտերյանը պատասխանեց, որ մեկ համայնքի կառավարման պարագայում արդյունավետությունը շատ ցածր է: Եվ պիլոտային ծրագիրը արձանագրեց որակյալ ու մրցունակ ավագանու ձևավորում:

«Միշտ չէ, որ հեծանիվ պետք է հորինենք, ամբողջ աշխարհն է այս ճանապարհով գնացել և գնում, խոսքը ընդամենը կառավարման համակարգի մասին է»,- ասաց Տերտերյանը: