Դատախազը Յուվեցի Կարոյի փեսայի համար 9 տարվա ազատազրկում պահանջեց

Քիչ առաջ Կենտրոն և Նորք-Մարաշ վարչական շրջանների ընդհանուր իրավասության դատարանում մեղադրող դատախազ Հարություն Սարգսյանը հրապարակեց նախորդ տարվա մայիսի 17-ին «Վերնիսաժ»-ի մոտ հնչած կրակոցների գործով մեղադրական ճառը: Դատախազը հայտնեց, որ ապացուցված են ամբաստանյալներին առաջադրված մեղադրանքները և միջնորդեց Գոռ Առաքելյանին դատապարտել 9 տարի, Վալերի Հովհաննիսյանին` 2 տարի 6 ամիս, իսկ Ներսես Մելքոնյանին` 2 տարի ժամկետով ազատազրկման:

Հիշեցնենք, որ Գոռ Առաքելյանը մեղադրվում է ապօրինի կերպով «Մակարով» տեսակի ատրճանակ ու փամփուշտներ ձեռք բերելու և պահելու մեջ:

Մեղադրական եզրակացության համաձայն՝ Առաքելյանը հիշյալ զենքի գործադրմամբ 2014թ. մայիսի 17-ին՝ ժամը 13:20-ի սահմաններում, Երևան քաղաքի Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ խուլիգանական դրդումներով, շատերի կյանքի համար վտանգավոր եղանակով փորձել է ապօրինաբար դիտավորությամբ կյանքից զրկել Վալերիկ Հովհաննիսյանին և Ներսես Մելքոնյանին, ինչպես նաև, անուղղակի դիտավորությամբ, կյանքին վտանգ սպառնացող ծանր մարմնական վնասվածքներ է հասցրել Մնացական Սուքիասյանին ու Մյասնիկ Հայրապետյանին, իսկ Ալվինա Բադալյանին՝ միջին ծանրության վնաս՝ առողջության տևական քայքայումով: Երեք ամբաստանյալների նկատմամբ էլ խափանման միջոց է ընտրվել կալանավորումը: