Էլեկտրաէներգիայի թանկացումը քաղաքականացնելը կտանի փակուղի. Միքայել Մելքումյան

ԱԺ ԲՀԿ խմբակցության պատգամավոր Միքայել Մելքումյանն այսօր լրագրողների հետ հանդիպման ընթացքում անդրադարձավ էլեկտրաէներգիայի թանկացմանը, դրա ազդեցություններին: Պատգամավորի կարծիքով`այս հարցի քաղաքականացումը կտանի փակուղի, և հարցին պետք է տալ մասնագիտական լուծումներ: Միքայել Մելքումյանը տեղեկացրեց, որ վերլուծական փաթեթ է մշակել, որով առաջարկում է հնարավոր տարբերակներ` էլեկտրաէներգիայի թանկացումից խուսափելու համար:

«Անձամբ ես վերլուծական փաթեթ եմ մշակել: Երկու անգամ հանդիպել եմ հանձնաժողովի կազմի և Ռոբերտ Նազարյանի հետ: Առաջարկել եմ էլեկտրաէներգիայի սակագնի մեթոդաբանության փոփոխություն: Պետությունը կարող է դառնալ ՀԷՑ-ում բաժնետեր»,- ասաց պատգամավորը:

Նա նշեց նաև, որ այն պարտքի չափը, որը խաթարում է ՀԷՑ-ի բնականոն գործունեությունը, քսանչորս միլիարդ դրամ է:

«Տարիներ շարունակ ՀԷՑ-ը էլեկտրաէներգիա է մատակարարում «Նաիրիտ»-ին, որևէ բան չի ստանում: 7800 աշխատող ունի ՀԷՑ-ը, և եթե դա բազմապատկենք 200 հազար դրամով, կստանանք մի քանի միլիարդ ծավալ: Սրան գումարվում են ընթացիկ գումարներ: Իմ առաջարկն այն է, որ պետք է արմատական աուդիտ անել և դրանք բերել այն տեսքին, որ չտանի սակագնի թանկացմանը»,- ասաց Մելքումյանը:

Նրա կարծիքով`սակագնի մեթոդաբանության փոփոխություն է հարկավոր: Ըստ պատգամավորի` պետությունը կարող է ՀԷՑ-ի բաժնետեր դառնալ: Նույնիսկ հինգ տոկոսը թույլ է տալիս, որ աուդիտ լինի:

Միքայել Մելքումյանի կարծիքով` լավ է, որ քաղաքացիական հասարակությունն իր շահերը պաշտպանում է ակցիաներով, սակայն, որպես տնտեսագետ, ինքը մոտեցումը ճիշտ չի համարում: «Քանի որ ես տնտեսագետ եմ, տեսա, որ ակցիաներ անելն ամբողջ պատկերը չի տալիս, ժողովուրդն ասում է` պետք չթանկանա, և վերջ: Պետք է հանրային ծառայությունները կարգավորող հանձնաժողովի հետ աշխատել և օպտիմալ լուծումներ մշակել»,- ասաց նա: