Ըստ ՀՀԿ-ական պատգամավորի` էլեկտրաէներգիայի թանկացումը «վատ երեւույթ է»

ԱԺ ՀՀԿ խմբակցության պատգամավոր Լեռնիկ Ալեքսանյանը կարծում է, որ Տիգրան Սարգսյանին ԱՄՆ-ում Հայաստանի դեսպան նշանակելը ճիշտ քայլ էր: «Նա գուցե վարչապետ նշանակվելու ժամանակ դեռ փորձված չէր քաղաքականության մեջ, բայց հիմա արդեն փորձված է»,-հայտարարեց ՀՀԿ-ական պատգամավորը եւ հավելեց, որ դեսպան նշանակելու համար կարևոր են նաև նախկին վարչապետի տնտեսական գիտելիքները և ինտելեկտուալ առումով պատրաստված լինելը:

Ինչ վերաբերում է էլեկտրաէներգիայի թանկացմանը, Ալեքսանյանն ասաց, որ «ժողովրդի այս վատ սոցիալական վիճակում թանկացումը շատ վատ երևույթ է»: Էլեկտրաէներգիայի թանկացումը պատգամավորը չի արդարացնում, «պարզապես գիտեմ, որ մի վիճակ է ստեղծվել, որ էներգետիկ համակարգը պիտի փրկվի»:

Թանկացումների մասին խոսելիս ասուլիսի մյուս բանախոսը՝ Քաղաքացիական միության նախագահ Հմայակ Հովհաննիսյանը, հայտարարեց, որ ոչ մի փաստարկ իրեն չի կարող գոհացնել: «Գնաճի պայմաններում էլեկտրաէներգիայի գնի թանկացման մասին խոսք լինել չի կարող: Ոչ մի փաստարկ թանկացման օգտին բանական չէ»,- ասաց նա: