ՀՀ-ում էլեկտրաէներգիայի հավանական թանկացումը հետաքրքրել է Արցախի վարչապետին

Արցախի վարչապետ Արա Հարությունյանը այսօր ընդունել է ՀՀ հանրային ծառայությունները կարգավորող հանձնաժողովի պատվիրակությանը՝ նախագահ Ռոբերտ Նազարյանի գլխավորությամբ:

Վարչապետը հետաքրքրվել է ՀՀ-ում էլեկտրաէներգիայի սակագնի հավանական բարձրացմամբ և հետագա միտումներով: Արա Հարությունյանը նշել է, որ կախված սակագներից՝ կարող են համապատասխան փոփոխություններ լինել Արցախի ներքին էներգետիկ ռեսուրսների շահագործման մոտեցումներում:

Արա Հարությունյանը կարևորել է պարբերական շփումները ԼՂՀ հանրային ծառայությունները և տնտեսական մրցակցությունը կարգավորող հանձնաժողովի և ՀՀ հանրային ծառայությունները կարգավորող հանձնաժողովի միջև` աշխատանքներն արդյունավետ համակարգելու և մասնագիտական վերապատրաստման համատեքստում:

Ռոբերտ Նազարյանը, ընդգծելով երկու հանձնաժողովների միջև համագործակցության բարձր մակարդակը, շեշտադրել է դրա խորացման ուղղությամբ առկա իրենց պատրաստակամությունը:

Վերջում վարչապետը հյուրերին է ներկայացրել «Արցախֆոնի» առաջին նմուշը, որն իրեն է նվիրել «Թեքնոլոջի ընդ Սայնս Դայնամիքս» ընկերության հիմնադիր Վահան Շաքարյանը: Կառավարության ղեկավարի խոսքով՝ աշխատանքներ են կատարվում Արցախում այդ հեռախոսի արտադրությունը սկսելու ուղղությամբ: Այս մասին հայտնում է ԼՂՀ կառավարության տեղեկատվության և հասարակայնության հետ կապերի բաժինը: