Էլեկտրաէներգիայի թանկացումը կազդի փոքր բիզնեսի վրա

Այսօր լրագրողների հետ հանդիպման ժամանակ Գործատուների միության նախագահ Գագիկ Մակարյանը, խոսելով էլեկտրաէներգիայի թանկացման հետևանքների մասին, նշեց, որ թանկացումը կազդի փոքր և միջին ձեռնարկությունների զարգացման վրա, հետեւաբար` փոքր բիզնեսն անկում կապրի:

«Փոքր բիզնեսն ավելի զգայուն է և մինչ օրս միշտ գտնվել է անհավասար մրցակցության պայմաններում, այն միշտ չզարգացող պրոցեսի մեջ է եղել: Իսկ հիմա էլեկտրաէներգիայի թանկացման պատճառով փոքր բիզնեսը կարող է անկում  ապրել»,- ասաց նա` հավելելով, որ ՀԾԿՀ-ի աշխատանքը համարում է անարդյունավետ և ոչ պրոֆեսիոնալ:

Ասուլիսի մյուս բանախոսը` ԱԺ ԲՀԿ պատգամավոր Միաքայել Մելքումյանը, մեջբերելով թանկացման պատճառաբանումը, թե ֆինանսական ճեղքվածքի  արդյունք է, նշեց, որ այդ ճեղքվածները վերացնելը կարող է ունենալ  այլընտրանքային լուծումներ, որի ճանապարհով հանձնաժողովը չգնաց:

Yerkir.am-ի հարցին, թե խոշոր ձեռնարկություններում հարկային նոր ստուգումները արդյո՞ք չեն հանգեցրել խոշոր ձեռնարկատերերի և կառավարության միջև լարված հարաբերությունների, Մակարյանը պատասխանեց. «Պետք է ասեմ, որ ոչ մի լարված հարաբերություններ չեն նկատվում, խոշոր ձեռնարկատերերի դեմքից դեռ ժպիտը չի պակասել, հակառակը` բողոքները հիմնականում փոքր և միջին ձեռնարկատերերի կողմից են»: