Բոլոր հայերի ցավը տանեմ. Բոլոնիայի գագաթաժողովին կրթությունից անցում կատարվեց զգացմունքներին

Տեղեկացրել ենք, որ այսօր Բոլոնիայի նախագահական գագաթաժողովում ընդունվեց կարևոր մի որոշում` Բելառուսն անդամակցեց Բոլոնիայի գործընթացին: Լրագրողների հետ զրույցում Բելառուսի պատվիրակության ներկայացուցիչ Նատալյա Բարանովան նշեց, որ ուրախ են` Բոլոնիայի ընտանիքի անդամ դառնալ:

Խոսելով Նորվեգիայի պատվիրակության` Բելառուսի անդամակցության հարցը հետաձգելու տեսակետի մասին` նա պարզաբանեց, որ իրականում Նորվեգիան դեմ չէր իրենց անդամակցությանը: «Նորվեգիան կարծում է, որ մեզ մոտ քիչ են ուսանողները, ովքեր զբաղվում են ակադեմիական աշխատանքով, սակայն դա նրանց տեսակետն է: Մեզ ավելի շատ հետաքրքրում է ֆինանսական խնդիրը, որի պատճառով սահմանափակվում է ուսանողների շարժունակությունը, իսկ Բոլոնիայի գործընթացը բուհերի միջև համագործակցության հնարավորություն է տալիս»,- ասաց Բարանովան:

Ինչ վերաբերում է ակադեմիական աշխատանքով զբաղվողներին, ապա, ըստ նրա, նրանք իրենց մոտ այնքան են, որքան Հայաստանում: «Եթե ձեր ունեցած տվյալները բավականացնում են, բավարար են ձեզ համար, մեզ նույնպես բավարար է մեր ունեցածը»,- ասաց բելառուս պատվիրակը:

Նա նշեց նաև, որ իրենց հանրակրթական դպրոցներում ընդունված է 11-ամյա կրթությունը, սակայն վերջին` 10, 11-րդ դասարաններում խորացված կերպով են մատուցում այն առարկաները, որոնք ընտրում են աշակերտները, և որոնք հետագայում մասնագիտության ընտրության հարցում պետք են լինելու նրանց: Կրթության տևողությունը, Բարանովայի կարծիքով, շատ բանի մասին է խոսում:

Հարցին, թե արդյո՞ք անհրաժեշտ էր Բոլոնիայի գործընթացի ներդրումը կրթական համակարգում, նա պատասխանեց, որ իրենք, ինչպես և մյուսները, այլ ընտրություն չունեին: «Աշխարհում միջազգայնացումը մեծ տեղ է գրավում, ամեն ինչ փոխկապակցված է, այդ թվում նաև` կրթական համակարգը, և այս դեպքում համեմատաբար քիչ սխալներով առաջ գնալ կարող ենք միայն փորձի փոխանակման միջոցով, ինչի հնարավորությունն էլ տալիս է Բոլոնիայի գործընթացը»,- նշեց նա:

Բարանովան լրագրողների հարցերին պատասխանելուց հետո դիմեց նրանց` ասելով. «Վե՞րջ: Թույլ տվեք հիմա ասել այն, ինչ ուզում եմ` բոլոր հայերի ցավը տանեմ: Դուք շատ յուրահատուկ լեզու ունեք, հայերենի հնչողությունը նման չէ ոչ մի լեզվի»: