Փոխարժեքներ
22 10 2024
|
||
---|---|---|
USD | ⚊ | $ 387.16 |
EUR | ⚊ | € 419.99 |
RUB | ⚊ | ₽ 4.03 |
GBP | ⚊ | £ 504.2 |
GEL | ⚊ | ₾ 142.18 |
Այսօր խորհրդարանական ճեպազրույցների ժամանակ «Ժառանգություն» խմբակցության ղեկավար Ռուբեն Հակոբյանը, ամփոփելով քառօրյան, նշեց, որ այն հագեցած էր` քննարկվեցին ՎՊ հաշվետվության և «Շրջանառության հարկի մասին» օրենքում փոփոխություններ կատարելու հարցերը:
ՎՊ հաշվետվության հետ կապված` նա նշեց, որ բացահայտորեն անտեսվեց, խախտվեց ԱԺ կանոնակարգ-օրենքը: Ըստ Ռուբեն Հակոբյանի` անգամ ՎՊ ծրագիրը չներկայացվեց, այսինքն` դա նշանակում է, որ ինչ-որ խաղեր են ընթանում, և դրանով անտեսում են ԱԺ-ն, խաղում ԱԺ-ի հեղինակության հետ: «ԱԺ-ն գործիք դարձավ քաղաքական խմբերի ձեռքին»,- ասաց պատգամավորը:
Խոսելով «Շրջանառության հարկի մասին» օրենքում լրացումներ անելու հարցի հետաձգման մասին` նա նշեց, որ դա աննախադեպ բան է, որ ընդունվում է օրենք, որը մեկ տարի չպետք է գործի: Սակայն Հակոբյանը դրական գնահատեց, որ իշխանությունն ու ընդդիմությունը կարողացան ընդհանուր հայտարարի գալ այդ օրենքի հարցով:
Լրագրողները հետաքրքվեցին, թե ի՞նչ արդյունքներ տվեց երեկվա` ԲՀԿ նախաձեռնությամբ կազմակերպված խորհրդաժողովը: Պատգամավորը նշեց, որ գոհ է արդյունքներից: Առաջիկայում ի մի կբերվեն մոտեցումները, և միասնական ծրագրով կներկայանան:
«Լավագույն տարբերակը մեր պետության համար, որ իշխանությունը վերջ տա իր ինքնասիրահարվածությանը` որ ամեն ինչ լավ է ընթանում, այլ համարժեք գնահատական տա ստեղծված ծանր վիճակին: Իշխանությունները պետք է պատրաստ լինեն արտահերթ ընտրություններին, որոնց պետք է նախորդեն ընտրական օրենսգրքում փոփոխությունները: Միայն այդ ձևով հնարավոր կլինի խուսափել ցնցումներից»,- ասաց Ռուբեն Հակոբյանը:
Հարցին, թե, այնուամենայնիվ, ոչ իշխանականները ցանկանում են գնալ հերթակա՞ն, թե՞ արտահերթ ընտրությունների, պատգամավորը պատասխանեց, որ խոսքն արտահերթ ընտրությունների մասին է: