Կյանքը ցույց է տվել, որ ՀՀ-ի եւ ԼՂՀ-ի միջեւ մաքսակետի գոյությունը իրեն չի արդարացրել. Դավիթ Բաբայան

Հոկտեմբերի 10-ին ՀՀ նախագահ Սերժ Սարգսյանը մեկնելու է Մինսկ, որտեղ նախատեսվում է ԵՏՄ-ին Հայաստանի անդամակցության փաստաթղթի ստորագրումը: Պայմանագրի ներկայիս տարբերակը ենթադրում է մաքսակետի տեղադրում Հայաստանի եւ սահմանակից այն երկրների սահմանին, որոնք չեն հանդիսանում ԵՏՄ անդամ: Ըստ այդ պայամանագրի` ստացվում է, որ մաքսակետ պետք է տեղադրվի նաեւ ՀՀ-ի եւ ԼՂՀ-ի միջեւ:

Yerkir.am-ի հետ զրույցում, խոսելով մաքսակետի մասին, ԼՂՀ նախագահի մամուլի խոսնակ Դավիթ Բաբայանը նշեց, որ, իր կարծիքով, մաքսակետ չի դրվելու, պարզապես այդ թեմայի շուրջ շահարկումներ են իրականացվում:

Դավիթ Բաբայանի խոսքով` ժամանակին` պատերազմական տարիներին, մաքսակետ եղել է Հայաստանի ու Արցախի սահմանին, սակայն անգամ այդ ժամանակ չեն եղել նման շահարկումներ: «Կյանքը ցույց է տվել, որ այդ մաքսակետի գոյությունն իրեն չի արդարացնում, այսինքն` չի ազդում տնտեսական փոխգործակցության վրա, և դրանք հանվել են: Հիմա, չգիտես` ինչու, շարունակվում են այդ շահարկումները»,- ասաց նա:

Ըստ Բաբայանի` Հայաստանն անդամ է ԱՀԿ-ին, այլ միջազգային կազմակերպությունների, և երբևէ մաքսակետի տեղադրման մասին որևէ մեկը չի խոսել:

Նա նշեց, որ բազմիցս է ասվել, որ մաքսակետ չի կարող դրվել, որ դրա իմաստը չկա, մանավանդ` Արցախի տնտեսությունն այդքան հզոր չէ: «Չկա մաքսակետ դնելու համար ո'չ օբյեկտիվ, ո'չ էլ սուբյեկտիվ պատճառ»,- ասաց Դավիթ Բաբայանը:

Հարցին` բացառվո՞ւմ է, արդյոք, որ Ղազախստանը կներկայացնի մաքսակետի տեղադրման պահանջ, մեր զրուցակիցը պատասխանեց, որ Ղազախստանը կարող է նման պահանջ ներկայացնել կամ չներկայացնել, դա այլ հարց է:

Իսկ, թե, այնուամենայնիվ, հոկտեմբերի 10-ին կստորագրվի՞ ԵՏՄ-ին Հայաստանի անդամակցության պայմանագիրը, թե՞ այն էլի կձգձգվի, Դավիթ Բաբայանը կարծիք հայտնեց. «Ժամանակը ցույց կտա: Չգիտեմ, կարող է նաև ստորագրվել»: