ԼՂՀ սահմանադրական բարեփոխումների հայեցակարգի մշակումը դեռևս նախնական փուլում է. Դավիթ Բաբայան

ԼՂՀ նախագահ Բակո Սահակյանը մարտի 21-ին ԼՂՀ նախագահին առընթեր սահմանադրական բարեփոխումների մասնագիտական հանձնաժողով ստեղծելու մասին հրամանագիր է ստորագրել: Հրամանագրով հաստատվել է հանձնաժողովի անհատական կազմը՝ ԼՂՀ Ազգային ժողովի նախագահ Աշոտ Ղուլյանի գլխավորությամբ: Հրամանագրի համաձայն՝ մասնագիտական հանձնաժողովին հանձնարարվել է մինչև 2016 թվականի մայիսի 1-ը նախագահին ներկայացնել սահմանադրական բարեփոխումների հայեցակարգը և հայեցակարգին հավանություն տրվելուց հետո՝ մինչև 2016 թվականի սեպտեմբերի 10-ը, մշակել և նախագահին ներկայացնել սահմանադրական բարեփոխումների նախագիծը:

ԼՂՀ նախագահի մամուլի խոսնակ Դավիթ Բաբայանը Yerkir.am-ի հետ զրույցում հայտնեց, որ սահմանադրական բարեփոխումների հայեցակարգի մշակումը դեռևս խիստ նախնական փուլում է:  Նրա խոսքով` ստեղծվել է մասնագիտական հանձնաժողով, որում  ներգրավված են իրավաբաններ, որոնք  ներկայացնում են իշխանության բոլոր թևերը` գործադիր, օրենսդիր, դատական:  

«Նրանք  պետք է այդ հայեցակարգը մշակեն: Գուցե լինեն մի քանի տարբերակներ, դրանցից մեկը պետք է ընտրվի, հավանության արժանանա նախագահի կողմից, այնուհետև կսկսեն աշխատել բուն առաջարկների, նախագծի  վրա: Դրանից բացի, բոլոր կուսակցությունները կունենան նաև իրենց խմբերը, որոնք պետք է այդ  առաջարկները ներկայացնեն: Նրանք արդեն իրենց կողմից կարող են տարբեր առաջարկներ անել այդ մասնագիտական հանձնաժողովին, որ այն մտցնի այս կամ այն տարբերակը կամ  ներկայացնի այն` որպես հայեցակարգային: Դա ցույց կտա ժամանակը: Մենք գտնվում ենք ամենասկզբնական փուլում  և կտեսնենք` երբ է այդ հայեցակարգը պատրաստ լինելու»,- ասաց Բաբայանը: