«Նաիրիտ»-ի ճակատագիրը չպետք է կապենք «Ռոսնեֆտի» հետ. Երվանդ Զախարյան

Արդեն հայտնել ենք, որ ՀՀ կառավարության շենքի առջեւ հավաքվել են «Նաիրիտ» գործարանի հարյուրավոր աշխատակիցներ, ովքեր պահանջում են, որ իրենց մոտ իջնի ՀՀ վարչապետ Հովիկ Աբրահամյանը: Նշենք, որ նաիրիտցիների խնդիրը նույնն է` 17 ամսվա չվճարված աշխատավարձեր ու գործարանի վերագործարկում: Վարչապետի փոխարեն քաղաքացիների մոտ իջան կառավարության ներկայացուցիչ Ալեքսանդր Ղազարյանը եւ էներգետիկայի նախարար Երվանդ Զախարյանը:

Վերջինս բողոքող քաղաքացիներին վստահեցրեց, որ ՀՀ վարչապետը զբաղվում է նրանց հուզող հարցերով: Հիշեցնենք, որ Հովիկ Աբրահամյանը խոստացել էր մինչև օգոստոսի վերջը լուծել նաիրիտցիների խնդիրները, սակայն նրանք մինչ օրս չեն ստացել 17 ամսվա աշխատավարձերը:

«Ուսումնասիրման աշխատանքներն ամփոփվում են, և ինչպես խոստացել էինք, որոշակի առաջարկությունների փաթեթ ներկայացվում է, մինչև սեպտեմբերի 15-ը այդ փաթեթը կներկայացնենք ձեզ»,- դիմելով քաղաքացիներին` ասաց նախարարը:

Անդրադառնալով «Ռոսնեֆտի» կողմից «Նաիրիտը» գնելու հարցին` Զախարյանն ասաց. «Ես ափսոսում եմ, որ «Ռոսնֆտի» կողմից նման առաջարկներ չկան: Ինձ թվում է, որ «Նաիրիտ» գործարանի հետագա ճակատագիրը մենք ձեզ հետ միասին չպետք է կապենք միայն «Ռոսնեֆտի» հետ»:

Զախարյանը նաև խոստացավ, որ մինչև սեպտեմբերի 15-ը աշխատակիցներին կվճարեն նրանց մեկ ամսվա աշխատավարձը: Սակայն նախարարի հավաստիացումներն էլ ավելի բորբոքեցին հավաքվածներին, և նրանք սկսեցին վանկարկել «վար-չա-պետ»:

Մանրամասները` yerkir.am-ի տեսանյութում: