«Նաիրիտ»-ը չվերագործարկելը շատ ավելի թանկ է նստելու, քան վերագործարկելը. Երվանդ Զախարյան

Այսօր ԱԺ էին հրավիրվել Համաշխարհային բանկի այն մասնագետները, որոնք ուսումնասիրություններ են անցկացրել «Նաիրիտ»-ում: Նրանք պետք է ներկայացնեին ուսումնասիրության արդյունքները, սակայն հրաժարվեցին լրատվամիջոցների ներկայությամբ հայտնել «Նաիրիտ»-ի վերագործարկման վերաբերյալ իրենց կարծիքը, ինչը հարուցեց պագամավորների դժգոհությունը:

Դա անտրամաբանական էր, քանի որ Համաշխարհային բանկի ուսումնասիրությունների ամբողջ ընթացքը և եզրակացությունը տեղադրված է էներգետիկայի և բնական պաշարների պաշտոնական կայքէջում, սակայն ՀԲ մասնագետները պահանջում են փակ քննարկում:

Էներգետիկայի ու բնական պաշարների նախարար Երվանդ Զախարյանը նշեց. «Համաշխարհային բանկի մասնագետների կարծիքը և առաջարկությունները հիմք չեն «Նաիրիտ»-ի վերագործարկման վերաբերյալ կառավարության կողմից կայացվելիք որոշումների համար: Կառավարությունն է վերջնականապես որոշելու «Նաիրիտ» գործարանի ճակատագիրը: Կառավարության դիրքորոշումն է` ճանապարհներ փնտրել գործարանի վերագործարկման համար: Մենք պատրաստ ենք լսել ցանկացած ներդրողի առաջարկություն»:

Նախարարը նշեց, որ կառավարությունը մեծապես հակված է ամեն ինչ անել գործարանի վերագործարկման համար, հենց թեկուզ այն պատճառով, որ գործարանի չվերագործարկումը հանգեցնելու է սարսափելի մեծ ծախսերի, որոնց կառավարությունը պատրաստ չէ: «Թող չթվա, թե սա տրիկոտաժի, հագուստի կամ ալյուրի գործարան է: Վաղը կարող ենք դնել սնանկացման ու սկսել մաս-մաս վաճառել: Դա այդպես չէ: Սա քիմիական գործարան է` իր բոլոր դժվարություններով, անվտանգության համակարգերով, լուրջ պատասխանատվություն է, անգամ` սնանկացման պրոցեսը: Ավելի հեշտ է վերագործարկելը, քան չգործարկելը, քանի որ չգործարկելը սարսափելի մեծ ծախսեր է առաջացնում պետության համար: Այնպես որ` թյուր կարծիք է, որ կառավարությունը «Նաիրիտ»-ը տանելու է սնանկացման»,- ասաց Զախարյանը: