Էլեկտրաէներգիայի սակագնի բարձրացումը ՀՀ-ից կախված չէ. Երվանդ Զախարյան

Այսօր էներգետիկայի ու բնական պաշարների նախարար Երվանդ Զախարյանը լրագրողների հետ զրույցում անդրադարձավ էներգետիկ համակարգում տիրող վիճակին և դրանից բխող` էլեկտրաէներգիայի սակագնի բարձրացման խնդրին:

Նա նշեց, որ ՀԷՑ-ն ունեցել է 37.6 մլրդ դրամի կորուստներ: Ինչ վերաբերում է ՀԷՑ-ի վերցրած վարկերին, ապա այդ կորուստները փակելու մասին, ըստ նախարարի, ինքը չի կարող որևէ բան ասել, քանի որ դա կոմերցիոն գաղտնիք է: Նա կարծիք հայտնեց, որ սակագնի բարձրացման համար հանձնաժողով տրված հայտերը հիմնավոր են, այլ հարց է, թե հանձնաժողովն ինչ որոշում կկայացնի ու որքանով կբարձրացնի սակագինը:

 «Ես չեմ ուզում թեթևացնել իրավիճակը, գիտակցում եմ ստեղծված տնտեսական վիճակը Հայաստանում, և որ դա լուրջ սոցիալական խնդիր է: Բայց սակագների բարձրացումը ՀՀ-ից կախված չէ, մենք սեփական էներգակիրներ չունենք, համակարգում կան հաստատուն ծախսեր, որոնք ուզես-չուզես, պիտի իրականացնես: Էներգետիկ համակարգում աշխատավարձը, համեմատած նույն ԵՏՄ պետությունների հետ, ավելի ցածր է»,- ասաց Զախարյանը:

Ըստ նրա` բոլոր երկրներում էլեկտրաէներգիայի սակագները շատ ավելի հաճախ են փոփոխվում, քան Հայաստանում:

«Ես ուզում եմ շատ պարզ լինել ձեզ հետ: Եվրոպական երկրներում յուրաքանչյուր ամիս սակագների փոփոխություն է լինում, և յուրաքանչյուր ամսվա վերջում քաղաքացին ստանում է վճարելու անդորրագիր՝ նոր սակագնով: Ընդհանրապես` սակագնային քաղաքականությունը վարելիս ՀՀ-ն նույնպես պետք է այդպես վարվի, այսինքն` յուրաքանչյուր տարի առնվազն մեկ անգամ պետք է սակագները վերանայվեն, որպեսզի չկուտակվեն խնդիրները, և մի օր սակագինը փոփոխվի արդեն մեծ տարբերությամբ»,- ասաց նախարարը, հավելելով, որ եթե ամեն տարի սակագինը վերանայվի, խնդիրները չեն կուտակվի, և սակագները քիչ կփոփոխվեն ամեն անգամ: