Նախկին վարչապետի հետ կապված` ես մեկնաբանություն չունեմ. Երվանդ Զախարյան

Այսօր ԱԺ-ում քննարկվում էր «Նաիրիտ» գործարանի շուրջ ստեղծված իրավիճակը:

Էներգետիկայի ու բնական պաշարների նախարար Երվանդ Զախարյանը նշեց, որ անցած ուրբաթ օրվանից կառավարությունը սկսել է նաիրիտցիների աշխատավարձերի վճարումը: Իսկ մինչ այդ որոշում է կայացվել` կրճատել աշխատողների թիվը մինչև 478 հոգու:

«Նոր ստեղծված պայմաններում մենք համատեղ պետք է որոշենք գործարանի ճակատագիրը: Ընտրությունը մեծ չէ` կա\'մ գործարանը կլուծարվի, կա\'մ կվերագործարկվի վստահելի ներդրողների շնորհիվ»,- ասաց նախարարը` հավելելով, որ գործարանն ունի մեծածավալ բնապահպանական խնդիրներ:

Երվանդ Զախարյանի խոսքով` կառավարությանը բոլորովին ձեռնտու չէ ընկերության լուծարումն ու սնանկացումը, որովհետև դա կհանգեցնի միլիոնավոր դոլարների ծախսերի, ինչին կառավարությունը պատրաստ չէ: Սակայն կառավարությունը պատրաստ է ամեն ինչի, որ գործարանը վերագործարկվի:

ԲՀԿ խմբակցության ղեկավար Նաիրա Զոհրաբյանը հարցրեց, թե «Նաիրիտ»-ի շուրջ ստեղծված վիճակում մեղավորության ի՞նչ բաժին ունի նախկին վարչապետ Տիգրան Սարգսյանը:

Երվանդ Զախարյանը պատասխանեց. «Նախկին վարչապետի և գործարանի նախկին աշխատանքների հետ կապված` ես մեկնաբանություն չունեմ և որևէ փաստ չունեմ»:

Ինչ վերաբերում է պոտենցիալ ներդրողներին, նախարարը նշեց, որ այսօր, դժբախտաբար, պոտենցիալ ներդրողներ չկան, նախկինում էլ չեն եղել, և  կոնկրետ առաջարկություններով ոչ ոք չի դիմել: