Պետական որևէ հայտարարություն դեռ չի եղել, որ գազի գինը սպառողի համար չի փոխվելու. Երվանդ Զախարյան

ԱԺ նիստում կառավարության հետ հարցուպատասխանի ժամանակ ԱԺ ՀԱԿ խմբակցության քարտուղար Արամ Մանուկյանը հարցրեց այս օրերին հասարակությանն ամենաշատը հուզող խնդրի` գազի սակագնի մասին: Նաը նշեց, որ ռուսական «Գազպրոմ»-ը հայտարարել է, որ Հայաստանին մատակարարվող գազի գինը սահմանին իջնում է 25 դոլարով, հետո եղավ նաև հայտարարություն, որ սպառողի համար գազի սակագինը չի իջնելու:

«Միայն ԱԱՀ մասով եթե իջել է գազի գինը, ապա գոնե, համապատասախանաբար, պետք է իջներ գազի սակագինը քաղաքացու համար: Եվ հետո` ինչպե՞ս կարող են հնչել հայտարարություններ այն մասին, որ քաղաքացու համար սակագինը չի փոխվում, եթե Հանրային ծառայությունները կարգավորող հանձնաժողովը դեռ նման որոշում չի կայացրել»,- հարցրեց Արամ Մանուկյանը:

Հարցին պատասխանեց էներգետիկայի և բնական պաշարների նախարար Երվանդ Զախարյանը` ասելով, որ իսկապես եղել է հայտարարություն, որ Հայաստանին մատակարարվող գազի սակագինը սահմանին իջնում է 25 դոլարով: Նախարարի խոսքով՝ դա հնարավոր է դարձել ՀՀ և ՌԴ կառավարությունների միջև 2,5 ամսվա բանակցությունների արդյունքում:

«Առայժմ, գազի գնի իջեցման հետ կապված, չկա պաշտոնական փաստաթղթային ձևակերպում: Պետական որևէ հայտարարություն որևէ տեղ դեռ չի եղել, որ գազի գինը սպառողի համար չի փոխվելու, որովհետև դրա համար կա Հանրային ծառայությունները կարգավորող հանձնաժողով, որը կկատարի ուսումնասիրություն և որոշում կկայացնի` սակագնի հետ կապված»,- ասաց նախարարը: