Վարչապետը հանձնարարեց պարզել՝ որքանո՞վ են արդարացի ճանապարհատրանսպորտային տուգանքները

Կառավարության այսօրվա նիստը վարչապետ Տիգրան Սարգսյանը սկսեց ճանապարհատրանսպորտային տուգանքներին անդրադարձով և համապատասխան հանձնարարականով: Նա նշեց, հատկապես, որ տուգանքների հարցը ժողովրդի շրջանում դառնում է դժգոհությունների և բողոքների պատճառ, ուստի առաջանում են հարցեր` որքանո՞վ են արդարացի նշանակված տուգանքները, համաչա՞փ են, արդյոք, մեր օրենսդրությանը, միջազգային պրակտիկայում այդ ուղղությամբ ինչպիսի՞ փորձ կա, կարելի՞ է դա կիրառել Հայաստանում և այլն:

Վարչապետը  հանձնարարեց կառավարության աշխատակազմի ղեկավար-նախարար Վաչե Գաբրիելյանին և նախարար Հրայր Թովմասյանին`  համատեղ աշխատել և պատրաստել որոշման տեքստ` այս հարցերի պատասխանը տալու համար:

Ձեռնարկվելիք քայլերի իրականացման առումով Հրայր Թովմասյանը ասաց, որ 1-2 ամիսը բավարար կլինի, որպեսզի ընդհանուր առմամբ պատկերացում կազմվի առկա խնդիրների վերաբերյալ, իսկ եթե լինի օրենսդրական նախաձեռնության անհրաժեշտություն, ապա 1 ամիս կպահանջվի: «2-2,5 ամիսը, կարծում եմ, լրիվ բավարար է»,- նշեց նա:

Վարչապետը հանձնարարեց, որ, բացի կառավարությունից և արդարադատության նախարարություններից, աշխատանքներին մասնակցեն նաև մնացած շահագրգիռ կազմակերպությունները և հասարակական կազմակերպությունները: