Վարչապետը հանձնարարեց գույքագրել վթարների ժամանակ ճանապարհային կահավորանքին պատճառված վնասները

Այսօր վարչապետ Կարեն Կարապետյանը հանձնարարական տվեց ճանապարհային երթևեկության կանոնների խախտման հետևանքով պետությանը պատճառված վնասների հատուցման ապահովման վերաբերյալ: Վարչապետի խոսքով՝ ճանապարհային երթևեկության կանոնների խախտման հետևանքով բազմաթիվ դեպքերում վնասվում են ճանապարհի երթևեկության անվտանգությունն ապահովող տարրերը՝ ճանապարհային նշանները, լուսացույցները, սյուները և այլն:

Չնայած օրենքով սահմանված կարգավորումներին` գործնականում գրանցվում են դեպքեր, երբ նշված տարրերի վերանորոգման և վերականգնման ծախսերի համար անհրաժեշտ փոխհատուցումները չեն հավաքագրվում:

Հաշվի առնելով վերոնշյալը` վարչապետը հանձնարարեց տրանսպորտի, կապի և ՏՏ նախարարին, տարածքային կառավարման և զարգացման նախարարին` մեկամսյա ժամկետում տարածքային համայնքների ղեկավարների հետ համատեղ գույքագրել ճանապարհային կահավորանքին պատճառված վնասի դեպքերը և ստացված փոխհատուցման շրջանակներում ձեռնարկել միջոցներ դրանց վերականգման ուղղությամբ: Ըստ անհրաժեշտության` քննարկել անհրաժեշտ իրավական ակտի մշակման հարցը: 

Ոստիկանապետին հանձնարարվեց սահմանել խիստ հսկողություն` ճանապարհային պատահարների դեպքերում համապատասխան եզրակացություններում ճանապարհային կահավորանքին պատճառված վնասները ներառելու համար: