Մենք հո ժողովրդի թշնամին չե՞նք. Հովիկ Աբրահամյանը` պարտադիր կուտակայինի մասին

ԱԺ նախագահ Հովիկ Աբրահամյանը համարում է, որ պարտադիր կուտակային կենսաթոշակային համակարգը, որպես բարեփոխում, հիանալի գաղափար է: «Պարզապես նորից եմ ուզում ասել, որ եթե կա խնդիր` որևէ օրենքի հետ կապված, մենք պատրաստ ենք այդ հարցերը վերանայել: Բայց, գլոբալ առումով, գաղափարը, որպես ռեֆորմ, շատ լավն է»,- այսօր լրագրողների հետ զրույցում ասաց ԱԺ նախագահը:

Նա նշեց, որ ներկայումս բազմաթիվ քննարկումներ են ընթանում կառավարության, Ազգային ժողովի և քաղաքացիական հասարակության հետ: «Բազմաթիվ ձևաչափերով ուզում ենք հասկանալ, թե խնդիրն ինչումն է: Սահմանադրական դատարանը դեռ կտա իր որոշումը, ամեն դեպքում` մենք հո մեր ժողովրդի թշնամին չե՞նք, մենք ուզում ենք լավ բարեփոխում իրականացնել: Եթե այդ բարեփոխման մեջ կան թերություններ, մենք պատրաստ ենք քննարկել», - ասաց նա: