Որոշակի օղակների հենց էս վայրկյանին գումար է պետք. Լուսինե Բադալյանը` պարտադիր կուտակայինի մասին

«Մենք մեր մասնակցությունն ենք ցուցաբերել պարտադիր կուտակային շարժման դեմ, որովհետև քիչ, թե շատ հայտնի մարդիկ, երբ միանում են որևէ նախաձեռնության կամ պայքարի, անտարբեր մարդիկ էլ սկսում են հետաքրքրվել խնդրով»,- այսօր լրագրողներին ասաց հաղորդավարուհի Լուսինե Բադալյանը՝ խոսելով պարտադիր կուտակային համակարգի դեմ մղվող պայքարին միանալու մասին:

Նա նշեց, որ «Դեմ եմ պարտադիրին» շարժմանն աջակցելու, միանալու և անգամ այդ համատեքստում լուսանկարվելու համար հայտնի մարդկանց խիստ քննադատեցին ու տարբեր պիտակներով որակավորեցին, բայց կարևորը շարժման լայն թափն է: Խոսելով այն մասին, որ քաղաքացիական պայքարը երբեմն կուսակցականացվում է, Լուսինե Բադալյանն ասաց. «Անկեղծ ասած, ես հեռանում եմ հանրահավաքից այն պահից, երբ սկսեցում են հնչել քաղաքական կարգախոսներ: Բայց ցանկացած հավաք միանգամից կուսակցականացվում է, ու հավաքը տապալվում է: Ես դրա մեջ չկամ: Հաճախ քաղաքացիներին կուսակցությունները օգտագործում են»,- ասաց նա՝ հավելելով, որ թեև աշխատում է «Կենտրոն» հեռուստաընկերությունում, բայց որևէ կուսակցական կողմնորոշում չունի:

Լուսինե Բադալյանի խոսքով՝ ակնհայտ է, որ շարժումը թափ է հավաքում, բայց դա նրանից է, որ բոլորի համբերության բաժակը լցվել է: Նա նշեց, որ ոչ թե օրենքին է դեմ, այլ խիստ կասկածում է, որ այսքան խնդիրների մեջ որոշեցին բարեփոխում իրականացնել: «Որոշակի օղակների հենց էս վայրկյանին գումար է պետք, նրանք ուզում են իրենց խնդիրները լուծել: Կանցնի մի քանի տարի, կասեն, որ օրենքն իրեն չի արդարացրել: Իրեն չարդարացրած կառավարությունն ուղղակի իրավունք չունի նման ռեֆորմ անցկացնելու»,- ասաց Լուսինե Բադալյանը:

Նա կարծիք հայտնեց, որ այսօրվա կառավարությունը իներտ է ու անհաղորդ ժողովրդի խնդիրներին, կառավարության համար միևնույն է, թե ինչպես է պայքարում ժողովուրդը: Լուսինե Բադալյանի համոզմամբ՝ քաղաքացիական շարժումն արդեն ձևավորվել է, և այն դուրս է եկել «պարտադիր կուտակային»-ի սահմաններից, չի կանգնելու այլևս ու չի նահանջելու: «Եթե ամբողջ ժողովուրդը կանգներ, իհարկե, ինչ-որ բան կփոխվի, բայց հասարակության մի մասը ստրկացած մտածելակերպ ունի, ցավոք, դուրս չի գալիս պայքարի: Ես պայքարում իմ խղճի համար, որ թույլ չտան մեզ ստրկացնել»,- ասաց հաղորդավարուհին: