Ուղեւորափոխադրողները սպառնում են քաղաքապետարանին եւ ուղեւորներին

Աստված չանի, որ քաղաքապետարանը չորրորդ օրվա ընթացքում չբավարարի մեր պահանջները, շատ վատ բան կլինի քաղաքապետարանի գլխին, կլինի` կտեսնեք. այսօր լրագրողների հետ հանդիպման ժամանակ սպառնալիք հնչեցրեցին ուղևորափոխադրող կազմակերպությունների ղեկավարները, որոնք բողոք-նամակով դիմել են քաղաքապետարանին` պահանջելով բավարարել իրենց պահանջները:

Նրանք հայտարարեցին, որ 100 դրամ սակագնով հնարավոր չէ նախապատրաստվել ձմռանը, փոխել անվադողերը, իսկ նման ձևով ուղեւորափոխադրում իրականացնելը հավասար է մարդասպանության, հետևանքները կարող են լինել անկանխատեսելի: Նախաձեռնել են ստորագրահավաք` տրասպորտի սակագնի բարձրացման պահանջով, և 62 ուղևորափոխադրող ընկերություններից 57-ը ստորագրել են բաց նամակը:

Ուղեւորափոխադրող ընկերությունների միության նախագահ Հրանտ Եղիազարյանի խոսքով` անցյալ անգամ ակտիվիստները աղմուկ բարձրացրեցին, ու քաղաքապետը կասեցրեց տրանսպորտի սակագինը 150 դրամ դարձնելը: Իսկ տրանսպորտի գինը չբարձրացնելու դեպքում օրինական կարգով գծատերերը կհրաժարվեն սպասարկել մարդկանց:

Հարցին, թե ի՞նչ սակագնով են պատրաստ աշխատել, գծատերերից մեկը նշեց` 200 դրամ, մյուսը` 139 դրամ:

Գծատերերը բողոքեցին թե'  վարորդներից, թե' քաղաքապետարանի վերաբերմունքից: Նրանք երեկ երեք ժամ են սպասել, մինչ քաղաքապետարանը բարեհաճել է ընդունել է իրենց: Նրանց համոզմամբ` լռելու տեղ այլեւս չունեն, 100 դրամ աշխատելու դեպքում ընկերությունները կոչնչանան:

Պատասխանելով Yerkir.am-ի հարցին` ի՞նչն է խանգարում իրենց շահույթից մարել ծախսերը, հետո` մտածել եկամուտների մասին, Հրանտ Եղիազարյանը նշեց. «Շահույթը մի կարկանդակ է, որից կծում են բոլորը, բայց ոչ` մենք: Հետապնդում ենք շահույթ, բայց չենք ստանում»: Նա հավելեց, որ պատրաստ են աշխատել 150 դրամով, եթե կառավարությունը համաձայնի 50 դրամի դոտացիա վճարել:

Ուղևորափոխադրող ընկերությունների ղեկավարները նշում են, որ իրենք կոտրած տաշտակի առաջ են դեռ 2008 թվականից, շատ անգամ դիմել են թե' քաղաքապետին, թե'  նախագահին ու վարչապետին: «Վարորդների բողոքները լուրջ մի ընդունեք, ես իմ հարազատների միջոցներով եմ գոյատևում»,- նշեց գծատերերից մեկը:

Ուղեւորափոխադրողները հայտարարեցին, որ դեմ չեն ո'չ ժողովրդին, ո'չ էլ քաղաքապետարանին, պարզապես իրենց հուզում են իրենց շահերը: