Բողոքի ակցիա իրականացնող ուղևորափոխադրողները հանդիպեցին կառավարության ներկայացուցիչների հետ

ՀՀ-ից ՌԴ և հակառակ ուղղությամբ ոչ կանոնավոր ուղևորափոխադրումներ իրականացնող ընկերությունների ներկայացուցիչներն այսօր բողոքի ակցիա էին իրականացնում կառավարության շենքի առջևց: Նշենք, որ հունիսի 1-ից ոչ կանոնավոր ուղեւորափոխադրում իրականացնող հայ վարորդներին թույլ չի տրվում մուտք գործել ՌԴ տարածք:

Բողոքի ակցիայի մասնակիցները դժգոհում են այս արգելքից, ինչպես նաև պահանջում են վերադառնալ լիցենզավորման նախկին կարգին:

Ոչ կանոնավոր ուղևորափոխադրող ընկերության տնօրեն Արտակ Կնյազյանը լրագրողների հետ զրույցում հայտնեց, որ այսօր հանդիպում են ունեցել ՀՀ փոխվարչապետ Տիգրան Ավինյանի գրասենյակի ղեկավար Վարագ Սիսեռյանի եւ փոխվարչապետի խորհրդական Գեորգի Մուրադյանի հետ: Նա նշեց, որ կառավարության ներկայացուցիչներն  այսօր պետք է հանդիպում ունենան տրանսպորտի նախարարության ներկայացուցիչների հետ, որպեսզի քննարկեն այս խնդիրները:

«Խոստացել են, որ լուծումները կլինեն` մեզ հետ համատեղ քննարկելով»,- ասաց Կնյազյանը:

Կառավարության ներկայացուցիչների հետ հանդիպումից հետո ուղևորափոխադրողները դադարեցրել են բողոքի ակցիան:

Նշենք, որ մայիսի 29-ին ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը հանդիպել էր ոչ կանոնավոր ուղևորափոխադրումներ իրականացնող ընկերությունների ներկայացուցիչներիհետ, լսել նրանց պահանջները և տեղեկացրել, որ նրանց կողմից առաջադրված խնդիրներն արդեն օրակարգում են: Նախարարության դիրքորոշմամբ ևս` խնդրի միակ լուծումը լիցենզավորման համակարգի վերականգնումն է։ Նախարարը նշել է, որ օրենսդրական փոփոխությունների փաթեթն արդեն պատրաստ է: