Հիմա ո՞վ կա Սերժ Սարգսյանի կողքին. Հովհաննես Իգիթյան

Այն,  ինչ կատարվում է Հայատանում, ընտրություն կոչել չի կարելի. ինչ-որ մեկն իր կաբինետում որոշում է,  թե ով  է դառնալու պատգամավոր, և նա էլ դառնում է: Այս մասին Լեռնիկ Ալեքսանյանի հետ բանավեճի ժամանակ հայտարարեց ՀՀՇ անդամ  Հովհաննես Իգիթյանը:

«Ստացվում է, որ մեր բնակչությունը սպասում է, թե երբ պետք է գա մի հարուստ մարդ, մի քիչ ասֆալտ անի, կարտոֆիլ բաժանի, նրան ընտրեն և թույլ տան, որ մնացած չորս կամ հինգ տարին անի այն` ինչ ուզում է»,- ասաց նա և հավելեց, որ ինքը  տասը տարի պատգամավոր է  եղել, և իրեն ընտրել է ժողովուրդը, իսկ ներկայումս,  ըստ նրա, առանց փող անհնար է ընտրվել:

Անդրադառնալով Հայաստանի անդամակցությանը ՄՄ-ին` Իգիթյանն ասաց. «Եվրոպայում մեծ ուշադրություն կա Հայաստանի նկատմամբ, կարծիք կա, որ Ռուսաստանը մեզ ճնշել է: Ռուսաստանն անում է այն, ինչ ցանկանում է: Հայաստանը, որպես ինքնուրույն միավոր, Ռուսաստանի կողմից չի ճանաչվում»:

Իգիթյանի խոսքով` ժամանակին Լևոն Տեր-Պետրոսյանը ուներ թիմ, այդ թվում` Սերժ Սարգսյանը և Ռոբերտ Քոչարյանը, հիմա ո՞վ կա Սերժ Սարգսյանի կողքին:

Պատասխանելով Իգիթյանի հարցին` Լեռնիկ Ալեքսանյանն ասաց, որ Սերժ Սարգսյանն ունի կուսակցություն, որն էլ նրա քաղաքական թիմն է: «Սերժ Սարգսյանը մի լավ գիծ ունի` նա շատ լավ լսում է բոլորին»,- հավելեց նա:

«Լսող ունենք, հիմա մեզ ասողներ են պետք»,- արձագանքեց  Իգիթյանը: