Ես կնայեի իմ կենսագրությանը, նոր միայն օպերայի թատրոնի տնօրենի համար կդիմեի. Լևոն Իգիթյան

«Ես, համենայն դեպս, կնայեի իմ կենսագրությանը, նոր միայն օպերայի թատրոնի տնօրենի համար կդիմեի»,- լրագրողների հետ հանդիպման ժամանակ անդրադառնալով Ալ. Սպենդիարյանի անվան օպերայի և բալետի ազգային ակադեմիական տնօրենի ընտրությանը` ասաց ճարտարապետ Լևոն Իգիթյանը:

Նա նշեց նաև, որ չի ցանկանում խառնվել թատրոնի ներքին կյանքին, սակայն, այնուամենայնիվ, թատրոնի տնօրենի` մշակութային ղեկավարման փորձ ունենալը շատ կարևոր է:

Հովհ. Թումանյանի անվան տիկնիկային թատրոնի տնօրեն Ռուբեն Բաբայանն էլ, իր հերթին, նշեց, որ վերջերս սովորություն է դարձել ինչ-որ պաշտոնի համար մրցույթ հայտարարելը, բայց արդյո՞ք նա, ով ամենահարմար պայմաններն է առաջարկում իր ծրագրով, նաև ամենաորակյալն է: «Ծրագիրը կարևոր բան է, բայց պետք է նաև նայել, թե ո՞վ է առաջարկում այդ ծրագիրը»,- ասաց նա:

Բաբայանը նշեց նաև, որ օպերայի թատրոնն անպայման պետք է գեղարվեստական ղեկավար ունենա, քանի որ թատրոնը կարող է լավ աշխատել, եկամուտ բերել, բայց դա գեղարվեստական քաղաքականության հետևանք չէ, այլ մենեջմենթի: