Աղվան Հովսեփյանին կվերանշանակեն. վստահեցնում է դատախազի եղբայրը

ՀՀ գլխավոր դատախազ Աղվան Հովսեփյանի լիազորությունների սահմանադրական ժամկետը լրացել է: Այս կապակցությամբ այսօր արդեն գլխավոր դատախազին ընդունել է ՀՀ նախագահ Սերժ Սարգսյանը:

Սերժ Սարգսյանը շնորհակալություն է հայտնել Հովսեփյանին՝ «երկարամյա ծառայության և իրավակարգի ամրապնդման գործում ներդրած ավանդի համար եւ հույս է հայտնել, որ Աղվան Հովսեփյանը տարիների իր փորձառությունն այսուհետ ևս կծառայեցնի հանրային շահերի պաշտպանության և իրավապահպան համակարգի հետագա զարգացման գործին»:

ԱԺ-ում Yerkir.am-ը գլխավոր դատախազի պատգամավոր եղբայր Ռուբեն Հովսեփյանից փորձեց պարզել, թե, նրա կարծիքով, եղբայրը կվերանշանակվի նույն պաշտոնում: Ռուբեն Հովսեփյանը հայտարարեց, որ եղբայրը դարձյալ կվերանշանակվի, քանի որ լավ է կատարում իր աշխատանքը: Նա համոզված է, որ եղբոր աշխատանքից գոհ են նաեւ քաղաքացիները:

Նշենք, սակայն, որ, Yerkir.am-ի տեղեկություններով, Աղվան Հովսեփյանը չի վերանշանակվելու: Նա անցնելու է այլ պաշտոնի: