Սպասելի էր ինչպես Աղվան Վարդանյանի, այնպես էլ Գալուստ Սահակյանի համար

Արդեն տեղեկացրել ենք, որ նախագահի թեկնածու, ԱԻՄ կուսակցության նախագահ Պարույր Հայրիկյանը չի օգտվի օրենքով իրեն տրված հնարավորությունից եւ չի դիմի Սահմանսդրական դատարան` ընտրությունները հետաձգելու պահանջով:

Yerkir.am-ը ԱԺ ՀՅԴ խմբակցության քարտուղար Աղվան Վարդանյանից հետաքրքվեց` իր համար սպասելի՞ էր Հայրիկյանի նման որոշումը: Այդ պահին ՀՅԴ-ական պատգամավորի կողքով անցնում էր ԱԺ ՀՀԿ խմբակցության ղեկավար Գալուստ Սահակյանը, եւ Վարդանյանն արձագանքեց, որ շատ սպասելի էր ինչպես իր, այնպես էլ Գալուստ Սահակյանի համար:

Ուշագրավ է, բայց Գալուստ Սահակյանն անգամ չփորձեց հերքել ՀՅԴ-ական պատգամավորի դիտարկումը:

Հարցին, թե` քարոզարշավի չհետաձգումը չի՞ անդրադառնա միջազգային հանրության կողմից տրվելիք գնահատականի վրա, Վարդանյանը պատասխանեց, որ ինքը երբեք չափից ավելի չի կարեւորել միջազգային կառույցների գնահատականները: «Այդ գնահատականները ելնում են իրենց շահերից, նպատակահարմարությունից: Բայց կմնա մի բան, պատմության մեջ կգրվի, որ քարոզարշավի ընթացքում թեկնածուներից մեկի դեմ հետաքրքիր, տարօրինակ մահափորձ է իրականացվել»,- նշեց ՀՅԴ պատգամավորը: