Յուրի Վարդանյանը ափսոսանք է հայտնել Գալուստ Սահակյանի քայլի համար

Վրաստանում ՀՀ դեսպան Յուրի Վարդանանին մայիսի 4-ին հրավիրել են Վրաստանի ԱԳՆ՝ Հարավային Օսիայի խորհրդարանի նախագահ Անատոլի Բիբիլովի հետ Հայաստանի Ազգային ժողովի նախագահ Գալուստ Սահակյանի հանդիպման հետ կապված. հայտնում է Новости-Грузия-ն՝ վկայակոչելով Վրաստանի ԱԳՆ-ն:

Վրաստանի փոխարտգործնախարար Գիգի Գիգիաձեն վրացական կողմի ծայրահեղ մտահոգությունն է հայտնել այս հանդիպման փաստի առթիվ: Նա նշել է, որ այդ փաստը հակասում է Հայաստանի և Վրաստանի միջև ավանդական բարեկամությանը և վնաս հասցնում երկկողմ հարաբերություններին:

Յուրի Վարդանյանը, իր հերթին, ափսոսանք է հայտնել կատարվածի հետ կապված և ասել, որ Երևանը անհապաղ կծանոթանա Վրաստանի դիրքորոշման հետ: 

Հիշեցնենք, որ Հայաստանի բարեկամ Վրաստանը  երեկ իր աջակցությունը հայտնեց Ադրբեջանի «տարածքային ամբողջականությանը»՝ հրաժարվելով ճանաչել ԼՂՀ-ում կայացած խորհրդարանական ընտրությունները, ինչպես նաև բարձր մակարդակով ներկա չգտնվեց Հայոց ցեղասպանության 100-ամյա տարելիցին նվիրված միջոցառումներին: