Եղբորս վերարկուն ինձ համար փոքրացրեցին. Գալուստ Սահակյանի ամենահիշարժան նվերը

ՀՀԿ փոխնախագահ, ԱԺ ՀՀԿ խմբակցության ղեկավար Գալուստ Սահակյանը եւ նրա ընտանիքն անհամբերությամբ են սպասում Նոր տարվան: Այս մասին Սահակյանը հայտնեց Yerkir.am-ի հետ զրույցում:

«Ընտանիքով հավաքվում ենք` որդիներով, հարսներով, թոռներով, եւ հաճելի պահեր ենք ապրում այդ երկու օրերին»,- պատմեց նա:

Ամանորն արտասահմանում չեն նշում, սովորաբար նշում են կա'մ Երեւանում, կա'մ Դիլիջանում, կա'մ Ջերմուկում: «Իհարկե, այստեղ ավելի թանկ է նստում, քան արտասահման գնալը, բայց հակում չունեմ արտասահման գնալու: Նախախնամություն ունեմ, որ մեր հողի վրա մեր մոտեցումներով նշենք տոնը: Պահպանողական բնավորություն ունեմ այդ առումով»,- հայտարարեց Սահակյանը:

ՀՀԿ փոխնախագահը խոստովանում է, որ Հայաստանում Ամանոր նշելը բավականին թանկ է նստում, հատկապես այդ օրերին ամեն ինչ թանկանում է: Այն, որ, օրինակ, մարդիկ կան, ովքեր տոնական սեղան գցելու համար վարկ են վերցնում, Գալուստ Սահակյանը ե'ւ դրական է համարում, ե'ւ բացասական:

«Բոլորն ապավինում են, որ հաջորդ տարին ավելի լավը պետք է լինի, եւ դա կապում են սեղանի առատության հետ, ինչը ե'ւ ճիշտ է, ե'ւ սխալ: Ճիշտ է այն առումով, որ բոլորը միասին նստում են ընթրիքի, կենացներ են խմում, բարեմաղթանքներ ասում: Սխալ է այն առումով, որ ժողովրդի զգալի մասն այդ հնարավորությունը չունի: Ես միշտ խոհեր եմ ունենում այդ ամբողջ ընթացքում, երբեմն մտորում եմ, թե ով է ամենաերջանիկը, եւ գտնում եմ, որ ՀՀ-ում երջանիկ մարդ չի կարող լինել, որովհետեւ եթե կողքդ գեթ մի փոքր թշվառություն կա, արդեն երջանիկ չես»,- հայտարարեց Գալուստ Սահակյանը:

ԱԺ ՀՀԿ խմբակցության ղեկավարը թեեւ խոստովանում է, որ Նոր տարուց հետո 15-20 օր առեւտուրը կանգնում է, քանի որ մարդիկ ծախսած են լինում իրենց վերջին գումարները, բայց, մյուս կողմից, ուրախությամբ արձանագրում է, որ մենք` հայերս, ավանդույթները պաշտպանում ենք:

Ձմեռ պապի գոյությանը ՀՀԿ փոխնախագահը մինչ օրս էլ հավատում է: «Դա մարդու ներաշխարհի ամբողջության մի մասն է կազմում: Իհարկե, դա այն մարդկանց մասին է, ովքեր այս կամ այն կերպ հավատավոր են, հավատում են նախախնամությանը, հավատում են տիեզերական ուժերին: Իսկ մարդն առանց նման հավատի չի կարող ապագայի նկատմամբ դրական վերաբերմունք ունենալ»,- նշեց Սահակյանը:

Նա պատմեց նաեւ, թե որն է եղել Ամանորին ստացած իր ամենահիշարժան նվերը: «50-կաններին, մի ձմռան, երբ մարդիկ ոչ թե վատ էին ապրում, այլ սարսափելի, հինգ երեխա էինք, ես տան փոքրն էի, հիշում եմ, որ մեծ եղբորս վերարկուն փոքրացրեցին, եւ այդ ձմեռ ես այդ վերարկուով անցկացրեցի: Դա մեծ հպարտություն էր, որովհետեւ ոչ բոլորը վերարկու ունեին, մարդիկ ընդամենը կարողանում էին ինչ-որ բանով փաթաթվել, որ չմրսեն: Իսկ երբ արդեն դպրոց հաճախեցի, զինվորական համազգեստին նման դպրոցական հագուստ կար, դպրոցում պահանջում էին, որ այդ հագուստով ներկայանաինք, եւ երբ այդ համազգեստը ստացա, մտածում էի, թե ինչ մեծ նվեր է»,- հիշեց Գալուստ Սահակյանը:

Այս տարի Ձմեռ պապից ԱԺ ՀՀԿ խմբակցության ղեկավարը նորմալ քաղաքական դաշտ է ցանկանում: