ԲՀԿ-ի հետ համագործակցությունը Լեւոն Զուրաբյանը չբացառեց

Վերջին շրջանում կոալիցիայի փլուզման մասին խոսակցություններն ավելի են թեժանում: Այդ համատեքստում էլ ոմանք տեսակետներ են հայտնում ԲՀԿ-ՀԱԿ, ՕԵԿ-ՀԱԿ հավանական համագործակցության վերաբերյալ: Լրագրողների հետ հանդիպման ժամանակ անդրադառնալով «Երկիր»-ի թղթակցի այս դիտարկմանը` ՀԱԿ համակարգող Լեւոն Զուրաբյանը հավանական համագործակցությունը չբացառեց:

«Մենք ցանկանում ենք կազմաքանդել ավազակապետությունը: Այսօր ավազակապետության շահերը սպասարկում է իշխող քաղաքական ռեժիմը, մենք անելու ենք այդ ռեժիմի թուլացմանն ուղղված ցանկացած քայլ»,- նշեց նա, ու թեեւ կոալիցիայի փլուզման հավանականության մասին կանխատեսումներ չցանկացավ անել, բայցեւ շտապեց ավելացնել, որ լարվածություն կոալիցիայում կա:

«ՀԱԿ-ը պատրաստ է համագործակցել ցանկացած ուժի հետ, որը հրաժարվում է ռեժիմի հետ համագործակցությունից եւ պայքարում է նրա դեմ: Աս փաստով այդ ուժը դառնում է ժողովրդի դաշնակիցը»,- նշեց Զուրաբյանը: ՀԱԿ համակարգողը հավելեց, որ որեւէ պայմանավորվածություն կամ հանդիպում ԲՀԿ-ի հետ չի եղել, եւ առաջիկայում նման բան եւս չի նախատեսվում: