Դասական երաժշտությունը փոխում է սրտի ռիթմը

Իտալացի գիտնականները հայտնաբերել են, որ դասական երաժշտություն լսելը փոխում է սրտի աշխատանքի ռիթմը. տեղեկացնում են Doctors.am-ը:

Հետազոտությունների համար ընտրվել է դասական գործերից 4 մաս: Տարբեր տեմպով և ռիթմային գունավորումներով մասերի տևողությունը կազմել է մոտ 3.5 րոպե: Այդ հատվածները լսելու ընթացքում գիտնականները չափել են սրտի բաբախումների հաճախությունը 16 առողջ կամավորների մոտ: Նրանց նաև խնդրել էին տալ երաժշտության էմոցիոնալ բնութագիրը:

Դրանից հետո հետազոտողները  որոշել են սրտի բաբախումների հաճախությունը վեգետատիվ վիճակում  գտնվող 9 հիվանդի մոտ, որոնք այդ վիճակում են հայտնվել գանգուղեղային վնասվածքի կամ ծանր հիվանդության հետեւանքով: Գիտնականների տվյալներով` երաժշտական ստեղծագործությունները նույնանման ազդեցություն էին թողնում թե՛ առողջ մասնակիցների, թե՛  հիվանդների վրա. երաժշտությունն ազդում է գլխուղեղի լիմբիկ համակարգի կառուցվածքային ֆունկցիաների վրա, որոնք կարգավորում են ներքին օրգանների աշխատանքները, պատասխանատու են հուզական ռեակցիաների համար եւ կարող են պահպանել իրենց ակտիվությունն անգամ ուղեղի ծանր վնասվածքներից հետո: