Խաչատրյանի երաժշտությունը սրտից է ծնվում եւ գնում դեպի սիրտ

Արամ Խաչատրյանի անվան միջազգային 7-րդ մրցույթը մեկնարկել է:

Մրցույթի բացման արարողության ժամանակ ՀՀ մշակույթի նախարար Հասմիկ Պողոսյանը հիշեց, որ Արամ Խաչատրյանը, առաջին անգամ իր կնոջը տեսնելով, նման բնութագիր է տվել. «Բացվեց դուռը, եւ ներս եկավ երջանկությունը»:

«Ահա ամեն անգամ Ա. Խաչատրյանի ստեղծագործությունները լսելիս, այնպիսի զգացողություն է, որ կարծես բացվում է դուռը, եւ ներս է մտնում երջանկությունը»,- նշեց նախարարը:

Նրա կարծիքով` Արամ Խաչատրյանի երաժշտությունը ցնցում է իր հզորությամբ, արեւի լույսով։

«Նրա երաժշտությունը, թեեւ համամարդկային է, սակայն, միեւնույն ժամանակ, նաեւ ներազգային: Սրտից է ծնվում նրա երաժշտությունը եւ գնում դեպի սիրտ»,- ասաց Հ. Պողոսյանը:

Մրցույթի բացման ընթացքում հանդես եկավ Հայաստանի պետական երիտասարդական նվագախումբը` դիրիժոր Սերգեյ Սմբատյանի գլխավորությամբ, ինչպես նաև մի շարք հեղինակավոր մրցույթների դափնեկիր, համաշխարհային դաշնամուրային մրցույթի մրցանակակիր Արմեն Բաբախանյանը, որին հանդիսատեսը «չէր թողնում», որ հեռանա բեմից:

«Շատ մեծ ակնկալիքներ ունեմ` մրցույթի հետ կապված: Կարծում եմ, որ լավագույնները հաղթելու են, եւ տաղանդավոր երեխաները կարողանալու են աշխարհում ներկայացնել Խաչատրյանի երաժշտությունը»,- ԵՐԿԻՐ-ի հետ զրուցում նշեց ՀՀ սփյուռքի նախարար Հրանուշ Հակոբյանը: