«Երևակայիր ռիթմը». 19 հոգանոց հայկական թիմը՝ Ցյուրիխում

Խուլ և լսող երիտասարդներից կազմված` հայկական 19 հոգանոց խումբը օգոստոսին մասնակցեց Շվեյցարիայում անցկացված «Երևակայիր ռիթմը» ծրագրին, որի նպատակն էր պարի և մարմնի լեզվի օգնությամբ կոտրել Հայաստանի, Շվեյցարիայի և Գերմանիայի երիտասարդների միջև առկա լեզվական և մշակութային խոչընդոտները:

Հայաստանից ծրագրի կազմակերպիչը «Դոկտոր սինեմա» երիտասարդական ՀԿ-ն է, որի անդամները, նախորդ տարի մասնակցելով շվեյցարական «Սուբկուլտ» կազմակերպության անցկացրած դասընթացին, ավելի լայն շրջանակով համագործակցության պայմանավորվածություն էին ձեռք բերել այս տարի:

«Երևակայիր ռիթմը» ծրագրի ժամանակ Հայաստանից, Շվեյցարիայից և Գերմանիայից մասնակիցները մեկ շաբաթվա ընթացքում պրոֆեսիոնալ պարուսույցի օգնությամբ բեմադրել են պարային ներկայացումներ, որոնք ցուցադրվել են Ցյուրիխի հանրային վայրերում: Ծրագրի ընթացքի մասին նկարահանվել է նաև վավերագրական ֆիլմ, որի մոնտաժային աշխատանքն ակնկալվում է ավարտել 2018-ին: Հայաստանից, որպես պարուսույց, խմբում ընդգրկված էր նաև Հայկ Հոբոսյանը՝ «Պարիր, թե կարող ես» հեռուստանախագծի հաղթողը:

Ծրագիրը ֆինանսավորվել է Շվեյցարիայի կառավարության կողմից, նաև աջակցել է ՀՀ մշակույթի նախարարությունը:

Այս տարի Խուլերի համաշխարհային օրը (World Deaf Day) կնշվի սեպտեմբերի 24-ին: