Ինչո՞ւ է Ժ. Անդրեասյանը նախարության ծառայողականները կրճատել, բուհինը՝ թողել

Նիկոլ Փաշինյանը վերջերս անձամբ ակտիվորեն լծվել է ծառայողական ավտոմեքենաների կրճատման գործին: Կառավարության վերջին որոշումներից մեկով կրճատվեցին ավտոմեքենաներ բազմաթիվ գերատեսչություններում: Թե ինչ մեթոդով արվեց այս «բարեփոխումը», ինչ հաշվարկով, ինչպես գրչի մի հարվածով ու առանց գլխուղեղներին զոռ տալու տարան ու բոլոր նախարարությունների, պետական հաստատությունների ավտոմեքենաները լցրեցին պահեստներ, և դրանով ինչպիսի ճգնաժամի առջև է կանգնել պետական համակարգը՝ այլ քննարկման հարց է: 

Օրինակ, նախարարություններում թողնվել է 1-ական ավտոմեքենա՝ նախարարի համար, որի պատճառով նախարարությունների աշխատանքն ուղղակի պարալիզացվել է: Շատ նախարարություններ, որոնց աշխատանքն անմիջականորեն առնչվում է սեփականատերերի հետ, խնդրում են վերջիններիս, որ մեքենաներով օգնեն աշխատանքները կազմակերպելիս:

Պարզ է՝ սեփականատերերն էլ այս դեպքերում կարող են առիթավորվել իրենցը թելադրել պետությանը: Կարճ ասած՝ խայտառակ պատկեր:

Փաշինյանական այս քաոսի մեջ բնական է, որ, ժողովրդական լեզվով ասված, պլստացել են բազմաթիվ ՊՈԱԿ-երի ու հիմնադրամների ծառայողական ավտոմեքենաները: 

Yerkir.am-ը շարունակում է ներկայացնել նմանատիպ կազմակերպություններում առկա ծառայողական ավտոմեքենաները: Առաջին խումբ կազմակերպություններից կներկայացնեք ՀՀ բուհերի ավտոմեքենաները, որպեսզի ուսանողները տեսնեն, թե նաև որտեղ են ծախսվում իրենց կողմից վճարվող ուսման վարձավճարները: 

Նախորդիվ ներկայացրել էինք Երևանի պետական համալսարանում, Երևանի պետական բժշկական համալսարանում, Հայաստանի ազգային ագրարային համալսարանում և  Հայաստանի պետական տնտեսագիտական համալսարանում առկա ծառայողական ավտոմեքենաները: Նշենք, որ ցանկում չենք ներկայացնելու բեռնատար ավտոմեքենաներն ու ավտոբուսները: 

Ահա առկա Խ. Աբովյանի անվան հայկական պետական մանկավարժական համալսարանի  ծառայողական ավտոմեքենաները.

1. TOYOTA CAMRY 2.5, 001 DD 03, 2020,
2. HYUNDAI H1, 786 CC 61, 2011,
3. HYUNDAYI ELANTRA 1.6, 788 CC 61, 2011,
4. HYUNDAYI ELANTRA 1.6, 787 CC 61, 2011:

Քանի որ նախորդիվ ներկայացված բուհերից որոշների ռեկտորները, ժողովրդական լեզվով ասված, նեղվել են, թե ինչու՞ ենք անդրադառնում այս թեմային, և ի՞նչ մի մեծ բան է մի քան ավտոմեքենան խոշոր բուհի համար, ապա ասենք, որ մեր խնդիրը չէ այս կամ այն բուհին վարկաբեկելը: Միգուցե բուհերին պե՞տք են ծառայողականները: Խնդիրը փաշինյանական քաոսը ներկայացնելն է, երբ մի հաստատությունից  (նախարարություններ ևն) կարող են գրչի մի հարվածով ու առանց հաշվարկելու ծառայողական մեքենաները սրբել, լցնել պահեստներն ու պարալիզացնել աշխատանքները, իսկ մյուսում՝ թույլատրել:  

Օրինակ, ՀՊՄՀ հոգաբարձուների խորհրդի նախագահը 2021 թվականից նույն ինքնը՝ ԿԳՄՍ նախարար Ժաննա Անդրեսայանն է: Հարց. ինչո՞ւ է Ժաննա Անդրեասյանը, իբրև կառավարության անդամ, մի դեպքում նախարարության ծառայողականները վերացրել, բուհի դեպքում՝ թողել: Եվ ամենևին կապ չունի՝ քանի՞ մեքենա: Խնդիրը երևույթն է, քաոսը:

Եվ, վերջապես, Արցախ հանձնվեց, արյամբ ազատագրված հողը համարվեց Ադրբեջանի մաս, բուհերից հատուկենտ արձագանքներ եղան: Հիմնականում՝ լռեցին: Հաշտվեցին փաշինյանական դավաճանությունների ու սահմանած խաղի կանոնների հետ: Եթե Արցախի հանձնման հետ կարելի է հաշտվել, ապա ծառայողականների դեպքում ինչու՞ է դժվար  վերստին ենթարկվելն այդ նույն անձի սահմանած կաննոներին: