Շվեդիան պատրաստվում է չեղարկել Թուրքիայի դեմ զենքի էմբարգոն

Ըստ շվեդական ԶԼՄ-ների՝ թագավորության զենք արտադրողները կարող են վերսկսել զենքի վաճառքը Թուրքիային, եթե անհրաժեշտ ստուգումներ կատարվեն՝ հաշվի առնելով ներկայիս հանգամանքները. հայտնել է ռազմավարական արտադրանքի արտահանման վերահսկողության շվեդական պետական տեսչությունը՝ ISP-ն:

Ավելի վաղ Թուրքիայի կառավարությունը ներկայացրել էր հինգ պահանջներից բաղկացած ցուցակ, որոնք Շվեդիան պետք է բավարարի, որպեսզի Թուրքիան համաձայնի Շվեդիայի անդամակցությանը ՆԱՏՕ-ին։ Թուրքական հինգ պահանջներից երկուսը վերաբերում են զենքի արտահանմանը։ Պահանջների համաձայն՝ Շվեդիան պետք է չեղարկի Թուրքիայի դեմ զենքի էմբարգոն, ինչպես նաև պարտավորվի դադարեցնել զենքի և ռազմական տեխնիկայի մատակարարումը PKK/PYD քրդական  կազմակերպություններին։

Շվեդիան գրեթե ամբողջությամբ դադարեցրել է Թուրքիային զենք և զինամթերք վաճառելը 2019 թվականի աշնանը՝ Սիրիայի հյուսիսում զինյալների դեմ թուրքական ռազմական գործողությունից հետո։ 2019 թվականի հոկտեմբերի 15-ին ISP-ի լիցենզավորման մարմինը չեղյալ է հայտարարել Թուրքիա զինամթերքի արտահանման բոլոր վավերական լիցենզիաները։ Նաև 2019 թվականին պետական կարգավորիչը մերժել է ընկերությունների՝ Թուրքիային զենք վաճառելու վերաբերյալ երեք դիմում, և դրանից հետո զենք չի վաճառվել։