Պենտագոնի կարծիքով՝ Շվեդիան և Ֆինլանդիան կկարողանան բանակցել Թուրքիայի հետ

Ըստ ԱՄՆ պաշտպանության փոխնախարար Քեթլին Հիքսի՝ Շվեդիան և Ֆինլանդիան կկարողանան բանակցել Թուրքիայի հետ ՆԱՏՕ-ին իրենց անդամակցության հարցով։

Ֆինլանդիան և Շվեդիան, ուկրաինական իրադարձությունների ֆոնին, ՆԱՏՕ-ի գլխավոր քարտուղար Իենս Ստոլտենբերգին են փոխանցել դաշինքին միանալու դիմումները։ Financial Times թերթը գրել է, որ Թուրքիան արգելափակել է Ֆինլանդիայի և Շվեդիայի՝ ՆԱՏՕ մտնելու հայտի քննարկման գործընթացի մեկնարկը։ Թուրքիայի նախագահ Թայիփ Էրդողանը հայտարարել է, որ Անկարան չի կարող «այո» ասել դաշինքին Ֆինլանդիայի և Շվեդիայի անդամակցությանը, քանի որ չի կարող հավատալ նրանց հավաստիացումներին Թուրքիայում արգելված Քուրդիստանի աշխատավորական կուսակցության ներկայացուցիչների հետ հարաբերությունների վերաբերյալ։

«Մենք հավատում ենք, որ Ֆինլանդիան և Շվեդիան կկարողանան ուղղակիորեն լուծել իրենց տարաձայնությունները թուրքական կողմի հետ»,- ըստ Reuters-ի՝ ասել է Հիքսը Օսլոյում Նորվեգիայի պաշտպանության նախարար Բյորն Արիլդ Գրեհեմի հետ հանդիպման ժամանակ։