Պարտադիր պատվաստումն այլևս պարտադիր չէ. եվրահանձնակատար

Տնտեսության հարցերով եվրահանձնակատար Պաոլո Ջենտիլոնին ասել է, որ պատճառ չի տեսնում, որ կառավարությունները պարտադիր պատվաստում կիրառեն կորոնավիրուսի դեմ՝ հաշվի առնելով համաճարակի ծանրության նվազումը։ Այս մասին գրում է Deutsche Welle-ն։

«COVID-19-ի դեմ պարտադիր պատվաստման մասին քննարկումն արդարացված էր մի քանի ամիս առաջ: Բայց ես չեմ կարծում, որ հիմա պարտադիր պատվաստման մասին քննարկման ժամանակն է», - ասել է Ջենտիլոնին:

Նա նշել է, որ մահացության և հոսպիտալացումների ընդհանուր անկում կա ամբողջ Եվրամիությունում: «Մենք նույն ուղու վրա ենք՝ թուլացնել սահմանափակումները երկիր առ երկիր», - ասել է հանձնակատարը։

Միաժամանակ նա ընդգծել է, որ սկզբունքորեն դեմ չէ պարտադիր պատվաստմանը։

Ջենտիլոնին մատնանշել է կարմրուկի դեմ պատվաստումների մասին հրամանները և հավելել, որ յուրաքանչյուր կառավարություն պետք է որոշի այս հարցը։