Ոչ մի թուղթ չեմ ստորագրի, բայց պապիլոմայի դեմ պատվաստումն անհրաժեշտություն է. Լևոն Ալթունյան

Պապիլոմայի դեմ պատվաստանյութը մեզ ոչ թե տրամադրել է ինչ-որ երկիր ու ստիպել այն պարտադիր կերպով գնել, այլ Առողջապահության համաշխարհային կազմակերպությունն է առաջարկել. «Ազատության» ֆեյսբուքյան ասուլիսի ժամանակ հավաստիացրեց առողջապահության նախարար Լևոն Ալթունյանը՝ պատասխանելով հարցին, թե վախ չկա՞` պատվաստանյութի կիրառման հետ կապված:

Ըստ նախարարի՝ «Գարդասիլը», մինչ Հայաստան ներմուծվելը, հետազոտվել է Հոլանդիայում և ստացել սերտիֆիկատ: Ալթունյանի խոսքով՝ սա խոսում է այն մասին, որ ՀՀ-ն անցկացրել է լրացուցիչ հետազոտություն:

«Պետք է փաստեմ, որ պատվաստվելուց հետո ոչ մի կողմնակի ազդեցություններ չեն հայտնաբերվել, բացի սրսկման տեղում ցավի զգացողությունից: Պատվաստումը մեզ թույլ կտա խուսափել արգանդի վզիկի քաղցկեղի դեպքերի 70 տոկոսից, իսկ 30 տոկոսի դեպքում կփորձենք այն ավելի շուտ հայտնաբերել և կանխարգելել: Այսինքն` դրան զուգահեռ, պետք է նաև շարունակենք սքրինինգային ծրագրերը. հնարավոր չէ անջատել սքրինինգային ծրագրերը պատվաստումներից»,- ասաց նախարարը՝ հավելելով, որ պատվաստանյութը պայքարելու է պապիլոմա վիրուսի 16 և 18 շճատիպերի դեմ, որոնք էլ արգանդի վզիկի քաղցկեղի առաջացման 70-71 տոկոսի պատճառ են:

Նրա խոսքով՝ Հայաստանում 100 000 կնոջից արգանդի վզիկի քաղցկեղ կա 15-ի մոտ, և իրենք ձգտում են հասնել Ֆինլանդիայի արդյունքին, որտեղ 100 000-ից 1-ի մոտ է քաղցկեղ:

Ֆեյսբուքյան օգտատերերից մեկի հարցին` պատրա՞ստ եք ստորագրել մի փաստաթուղթ, որ եթե պատվաստումները կողմնակի ազդեցություն ունենան, Դուք քրեական պատասխանատվությունից չեք խուսափի, նախարարը պատասխանեց, որ հարցը պրովոկացիոն է: «Ես ոչ մի թուղթ չեմ ստորագրի, բայց կարող եմ ասել, որ պատվաստումն անհրաժեշտ է Հայաստանում»,- հավելեց նա:

Մեկ այլ հարցի` նախարարը կպատվաստի իր աղջկան կամ այլ հարազատների, պատասխանեց` միանշանակորեն: