Թուրքիան հրաժարվել է Հունաստանի և Իսրայելի ներկայությամբ քննարկել Լիբիայի հարցը

Թուրքիան չի մասնակցի Լիբիայի հարցով Փարիզի համաժողովին, որին կմասնակցեն Հունաստանը, Կիպրոսի Հանրապետությունը և Իսրայելը.  ըստ Daily Sabah-ի՝ ընոյեմբերի 1-ին հայտարարել է Թուրքիայի նախագահ Ռեջեփ Էրդողանը Հռոմում Ֆրանսիայի նախագահ Էմանուել Մակրոնի հետ հանդիպումից հետո։

Էրդողանը նշել է, որ Ֆրանսիան որոշել է Լիբիայի հարցով խորհրդաժողով անցկացնել, ինչպես հունիսին կայացած Բեռլինի խորհրդաժողովը։ «Մենք նրան (Մակրոնին) ասացինք, որ չենք կարող մասնակցել Փարիզի համաժողովին, որին կմասնակցեն Հունաստանը, Իսրայելը և Կիպրոսի Հանրապետությունը»,- հայտնել է նա գագաթնաժողովից վերադառնալուց հետո։

Էրդողանն ասել է, որ Թուրքիայի ներկայությունը Լիբիայում օրինական է և իբր հիմնված Լիբիայի կառավարության հետ Թուրքիայի պայմանավորվածության վրա։

Բացի դրանից՝ նա պատմել է, որ Մակրոնի հետ քննարկել է Ֆրանսիայի և Հունաստանի միջև վերջերս ձեռք բերված համաձայնագիրը՝ Աթենքին Rafale կործանիչներ մատակարարելու վերաբերյալ։ Էրդողանն ասել է, որ Մակրոնն իրեն ասել է, որ Հունաստանը փող ունի՝ դրանք գնելու համար։ Ի պատասխան՝ Էրդողանն ասել է, որ Հունաստանը խաբում է, փող չունի, իրականում 400 միլիարդ եվրոյի պարտք ունի։

Թուրքական թերթերից մեկի համաձայն՝ կործանիչները Հունաստանին վաճառելու՝ Ֆրանսիայի որոշումը կրկին սրում է լարվածությունը Արևելյան Միջերկրական ծովում ամիսներ տեւած հարաբերական անդորրից հետո։

Հունական Skai հեռուստաալիքը Էրդողանի այս հայտարարությունները կապել է Հունաստանի և Ֆրանսիայի, ինչպես նաև Հունաստանի և ԱՄՆ-ի միջև վերջերս կնքված պաշտպանական համաձայնագրերի վերաբերյալ նրա խիստ դժգոհության հետ։ Դրանցից առաջինը նախատեսում էր Rafale-ի վաճառք, մյուսով՝ թուրքական սահմանների մոտ ամերիկյան բազաների ուժեղացում։