Թուրքիան մտադիր չէ մասնակցել Լիբիայի դեմ գործողություններին

Թուրքիան մտադիր չէ մասնակցել Լիբիայի դեմ կոալիցիոն գործողություններին: Այդ մասին վերջնական որոշումը կկայացվի այսօր` վարչապետ Ռեջեփ Թայիփ Էրդողանի նախագահությամբ անցկացվելիք խորհրդակցության ժամանակ:

Թուրքական մամուլի տեղեկություններով` կիրակի օրը ՆԱՏՕ-ի Խորհրդում Թուրքիան խոչընդոտել է Լիբիայի օդային տարածքը թռիչքազերծ գոտի դարձնելու որոշմանը: Այդ դիրքորոշման հետեւանքով ՆԱՏՕ-ի Խորհուրդը չի կարողացել համաձայնության գալ Լիբիայի դեմ ռազմական գործողություն իրականացնելու հարցում եւ Դաշինքի գլխավոր քարտւղար Անդերս Ֆոգ Ռասմուսենը չի հնչեցրել նախատեսված հայտարարությունը:

Թուրքական մամուլը տեղեկացնում է, որ Թուրքիան դեմ չէ Լիբիայի դեմ ռազմական գործողությանը, սակայն դեմ է օդային հարվածներին, որոնց ընթացքում զոհվում են խաղաղ բնակիչներ: Իսկ CNN-Turk հեռուստաընկերության տեղեկացմամբ` Թուրքիան ինքնաթիռներ ու նավեր կտրամադրի ՆԱՏՕ-ին, սակայն ինքը ակտիվորեն չի մասնակցի «Ոդիսական. լուսաբաց» գործողությանը: