Գերմանիան Վրաստանի տարածքով իր զորքերը դուրս կբերի Աֆղանստանից

Գերմանիան դիմել է Վրաստանին՝ Աֆղանստանից իր զորքերի դուրս բերման գործընթացում աջակցության խնդրանքով:

Արտաքին գործերի նախարարության խոսքով՝ խորհրդակցությունների արդյունքում որոշում է կայացվել Թբիլիսիի միջազգային օդանավակայանում տարածաշրջանային ժամանակավոր տարանցիկ հանգույց ստեղծել:

Հունիսի սկզբից Թբիլիսիի օդանավակայանում տեղակայվել են 60 հոգանոց անձնակազմ և մի քանի A400M ռազմական ինքնաթիռներ, որոնք պատկանում են Գերմանիայի ռազմաօդային ուժերին և բեռներ ու անձնակազմ են տեղափոխել աֆղանական Մազար ի Շարիֆից Թբիլիսի՝ Գերմանիա տեղափոխվելու համար։

Նախարարության տվյալներով՝ ընդամենը մեկ ամսվա ընթացքում տեղափոխվել է 2000 զինվորական ու քաղաքացիական անձ: Բացի դրանից՝ գործողության շրջանակներում Աֆղանստանից հանվել են զինամթերք և ռազմական տեխնիկա:

Վրաստանն առաջին անգամ է մասնակցել միջազգային նման տարանցիկ գործողության:

Գերմանիայի ռազմաօդային ուժերի խոսնակ Օլաֆ Ուելերը Վրաստանի Առաջին ալիքին ասել է, որ սա որոշ չափով ավարտում է գերմանական և վրացական զորքերի լավ համագործակցությունը: